మాట నిలబెట్టుకోలేని కాంగ్రెస్ : మాజీ ఎమ్మెల్యే సతీష్ కుమార్

దిశ, హుస్నాబాద్ : కాంగ్రెస్ ప్రభుత్వం రైతులకు ఎకరానికి రూ.15 వేలు ఇస్తానని చెప్పి మోసం చేసిందని హుస్నాబాద్ మాజీ ఎమ్మెల్యే సతీష్ కుమార్ అన్నారు. సోమవారం పట్టణంలోని అంబేద్కర్ చౌరస్తాలో రైతులకు మద్దతుగా బీఆర్ఎస్ నాయకులు చేపట్టిన నిరసన కార్యక్రమంలో రైతాంగానికి సంఘీభావంగా పాల్గొన్నారు. 2023 అసెంబ్లీ ఎన్నికల్లో భాగంగా వరంగల్ రైతు డిక్లరేషన్ లో ఎకరానికి రూ. 15 వేల రైతు భరోసా ఇస్తానని హామీ ఇచ్చి ఇప్పుడు రూ. 12 వేలు ఇస్తానని చెప్పడం రైతులను మోసం చేయడమేనని అన్నారు. రైతులకు ఇచ్చే రైతు భరోసా కుదించడం మాట నిలబెట్టుకోలేని కాంగ్రెస్ ప్రభుత్వానికి తార్కాణం అని పేర్కొన్నారు. ఈ నిరసన కార్యక్రమంలో బీఆర్ఎస్ పార్టీ నాయకులు, కార్యకర్తలు తదితరులు పాల్గొన్నారు.