Political war : దుమారం రేపుతున్న ఆడియో...వీడియోలు

దిశ, హుజురాబాద్ : హుజురాబాద్ లో ప్రస్తుతం నాగార్జున డెయిరీ వివాదం దుమారం రేపుతోంది. ఒకరు ఆడియో విడుదల చేస్తే, మరొకరు వీడియో విడుదల చేస్తున్నారు. ఒకరిపై మరొకరు ప్రెస్ మీట్ లు పెట్టి ఆరోపణలు, ప్రత్యారోపణలు చేసుకోవడంతో ఈ వివాదం కాస్తా రాజకీయ రంగు పులుముకుంది. హుజురాబాద్ లో నాగార్జున మిల్క్ డెయిరీ చైర్మన్ పుల్లూరి ప్రభాకర్ రావు పై పలు ఆరోపణలు చేస్తూ ఇటీవల నిత్యం పత్రికల్లో వార్తల్లో ఉండటం, సంపత్ అనుచరుడు తనను డబ్బులు డిమాండ్ చేశాడని ఆడియోని ప్రభాకర్ రావు విడుదల చేశారు. దీనికి ప్రతిగా సంపత్ తనను బదనాం చేయడానికి ఎమ్మెల్యే కౌషిక్ రెడ్డి, ప్రభాకర్ రావు పథకం ప్రకారం కంకణం కట్టుకుని దుష్ప్రచారం చేస్తున్నారని, ఈ విషయమై సీపీ విచారణ

చేసి దోషులను శిక్షించాలని మరో వీడియో విడుదల చేశాడు. దీనికి ప్రతిగా ప్రభాకర్ రావు మరో ఆడియో విడుదల చేశాడు. అందులో కోట్లు ఉన్నోన్ని కొడతా, లక్షలు ఉన్నోన్ని కొడతా అని, భూదందాలో సెటిల్మెంట్ చేస్తే 10 లక్షలు తీసుకుంటా అని ఉండడం చర్చనీయాంశంగా మారింది. ఈ విషయం ఇలా పబ్లిక్ లో నానుతుండగానే సంపత్ తరుపున రిటైర్డ్ సీఐ దాసరి భూమయ్య డెయిరీ తరుపున ప్రెస్ మీట్ పెట్టారు. సంపత్ తన ప్రెస్ మీట్ లో కౌశిక్ రెడ్డి పై విమర్శలు చేయడం, కాంగ్రెస్ లో ఉన్న భూమయ్య సంపత్ కు అనుకూలంగా ప్రెస్ మీట్ పెట్టడం తో ఇక్కడ దుమారం రేపుతోంది. కాగా తనను బ్లాక్ మెయిల్ చేసి డబ్బులు డిమాండ్ చేయడమే కాకుండా తన డెయిరీ ని అప్రతిష్ఠపాలు చేస్తున్న వారిపై చర్య తీసుకోవాలని కోరుతూ సీపీకి ఫిర్యాదు చేసినట్టు తెలిసింది.