తెలంగాణలో JP Nadda టూర్ రీ షెడ్యూల్

దిశ, తెలంగాణ బ్యూరో : బీజేపీ జాతీయ అధ్యక్షుడు జేపీ నడ్డా టూర్ రీషెడ్యూల్ అయింది. అనుకున్న తేదీకి ఒక రోజు ముందుగానే ఆయన తెలంగాణకు రానున్నారు. బీజేపీ రాష్ట్ర అధ్యక్షుడు బండి సంజయ్ ఐదో విడుత ప్రజా సంగ్రామ యాత్రను నిర్మల్ జిల్లా ముధోల్ నియోజకవర్గం నుంచి ప్రారంభించిన విషయం తెలిసిందే. కాగా ఆయన సొంత జిల్లా అయిన కరీంనగర్‌లో ముగింపు నిర్వహించాలని ప్లాన్ చేసుకున్నారు. ఈనెల 17వ తేదీ వరకు యాత్ర ముగించాలని తొలుత నిర్ణయించుకున్నా పలు కారణాల ద్వారా షెడ్యూల్ మారుతూ వచ్చింది. ఈనెల 16వ తేదీన జేపీ నడ్డా షెడ్యూల్ ఖరారైనట్లు బీజేపీ శ్రేణులు తొలుత క్లారిటీ ఇచ్చాయి. అయితే అదేరోజు నడ్డా హిమాచల్ ప్రదేశ్‌కు వెళ్లాల్సి ఉండటంతో ప్రజా సంగ్రామయాత్ర ముగింపు తేదీ షెడ్యూల్‌లోనూ మార్పులు చేశారు. 15వ తేదీన పాదయాత్రకు ముగింపు పలకాలని నిర్ణయించుకున్నారు. బండి సంజయ్ సొంత పార్లమెంట్ సెగ్మెంట్ కావడంతో కరీంనగర్‌లో ముగింపునకు భారీగా ప్లాన్ చేయాలని భావిస్తున్నారు. ఇదిలా ఉండగా ఈనెల చివరివారంలో ఆరో విడుత యాత్ర కూడా ప్రారంభంకానుంది. సమయం తక్కువగా ఉండటం కూడా షెడ్యూల్ మారడానికి కారణమైంది.