KBR Park : కేబీఆర్ పార్క్ వద్ద కారుతో బీభత్సం సృష్టించిన వ్యక్తి అరెస్ట్
దిశ, ఖైరతాబాద్ : స్టాండ్ - అప్ కమెడియన్, వ్యాపారవేత్త ఉత్సవ్ దీక్షిత్‌ను హైదరాబాద్ నగరంలోని కేబీఆర్ పార్క్ వద్ద పోర్షే ప్రమాదం ఘటనలో అరెస్ట్ చేశారు. బంజారాహిల్స్‌కు చెందిన దీక్షిత్‌ (33) శుక్రవారం తెల్లవారుజామున బంజారాహిల్స్‌లోని కేబీఆర్ పార్క్ ప్రహారీ గోడను లగ్జరీ కారుతో ఉత్సవ్ ఢీకొట్టాడు. ప్రమాదం జరిగిన తర్వాత అతను అక్కడి నుంచి పారిపోయాడు. బంజారాహిల్స్ అసిస్టెంట్ కమిషనర్ ఆఫ్ పోలీస్ ఎస్. వెంకట్ రెడ్డి తెలిపిన వివరాల ప్రకారం… “ కారు అజాగ్రత్తగా నడపడం వల్లే ప్రమాదం జరిగినట్లు ప్రాథమిక విచారణలో తేలింది. ఈ సంఘటన తెల్లవారుజామున 5.45 గంటలకు జరిగింది. డయల్ 100కి ఒక పౌరుడు కాల్ చేయడంతో పెట్రోలింగ్ పోలీసులు సంఘటనా స్థలానికి చేరుకున్నారు. కెబిఆర్ పార్క్ సరిహద్దు గోడను ఢీకొట్టిన రెడ్ కలర్ పోర్షే కారు చెట్టును ఢీకొట్టి గోడకు, గ్రిల్స్‌కు, పేవ్‌మెంట్‌కు తీవ్ర నష్టం కలిగించిందని పోలీసులు దీనిపై సుమోటో కేసు నమోదు చేసి నిందితుడిని గుర్తించి అరెస్టు చేశారు. పోలీసులు అతన్ని మద్యం, మత్తు పదార్థాల వైద్య పరీక్షలకు పంపించారు.” డ్రైవింగ్ లైసెన్స్‌ను స్వాధీన పరుచుకునట్లు తెలిపారు.
