అలర్ట్: హైదరాబాద్ శివారులో భారీగా కల్తీ పాల తయారీ

దిశ, వెబ్‌డెస్క్: హైదరాబాద్ నగర శివారులో మరోసారి పోలీసులు కల్తీ పాల గుట్టు రట్టు చేశారు. పాశమైలారం పారిశ్రామిక వాడలో మంగళవారం కల్తీ పాల కేంద్రాలపై విస్తృతంగా దాడులు నిర్వహించారు. ప్రముఖ బ్రాండ్ల పేరుతో పాలు, పెరుగు, పన్నీరు తయారు చేస్తున్న ముఠాను అదుపులోకి తీసుకున్నారు. అంతేగాక, వేల లీటర్ల కల్తీ పాలను స్వాధీనం చేసుకున్నారు. అనంతరం నిందితులపై చీటింగ్ కేసు నమోదు చేశారు. ఈ కల్తీ పాలు తాగి ప్రజలు అనారోగ్యానికి గురవుతున్నారు. ముఖ్యంగా చిన్నారుల రోగ నిరోధక శక్తి కూడా తక్కువగా ఉంటుంది. ఈ నేపథ్యంలో కల్తీ పాలను తాగటంతో చిన్నారులు తీవ్ర అనారోగ్యానికి లోనవుతున్నారు. జీర్ణకోశ వ్యాధులు, న్యూమోనియ వంటి రోగాల బారిన పడుతున్నారు. ధనార్జనే ధ్యేయంగా అక్రమార్కులు కల్తీ పాల వ్యాపారం జోరుగా సాగిస్తున్నారు. దీంతో విషయం తెలుసుకున్న పోలీసులు రంగంలోకి దిగి దాడులు జరిపారు.