బాత్రూంల నిర్మాణానికి ఎమ్మెల్యే గాంధీ శంకుస్థాపన

దిశ, శేరిలింగంపల్లి : శేరిలింగంపల్లి ప్రభుత్వ ప్రాథమికోన్నత పాఠశాలలో చదువుతున్న 613 మంది బాలికలకు రెండే బాత్రూంలు శీర్షికన గత నెలలో దిశ దినపత్రికలో ప్రచురితం అయిన వార్తా కథనంపై అధికారులు మొద్దు నిద్ర నటించినా.. పూర్వ విద్యార్థిని తన మంచి మనస్సు చాటుకున్నారు. తాను చదివిన పాఠశాలలో వందలాది మంది విద్యార్థినులు పడుతున్న ఇబ్బందులను అర్ధం చేసుకున్న 2000 సంవత్సరపు పదవ తరగతి బ్యాచ్ పూర్వ విద్యార్ధి చింతకింది మీనా మహేందర్ గౌడ్ (చాముండేశ్వరి) రూ.5 లక్షలతో బాత్రూంలు కట్టించేందుకు ముందుకు వచ్చారు.

స్వాతంత్ర్య దినోత్సవ సందర్భంగా శేరిలింగంపల్లి ఎమ్మెల్యే అరేకపూడి గాంధీ చేతుల మీదుగా బాత్రూంలకు శంకుస్థాపన చేయించారు. అనంతరం ఎమ్మెల్యే గాంధీ మాట్లాడుతూ.. విద్యార్థుల సౌకర్యార్థం బాత్రూంలు కట్టించేందుకు ముందుకు వచ్చి మీనా మహేందర్ గౌడ్ ను అభినందించారు. తాను చదివిన పాఠశాలకు హితోధికంగా ముందుకు వచ్చిన మీనా మహేందర్ గౌడ్ ఎంతో మందికి ఆదర్శనీయమన్నారు. శేరిలింగంపల్లి నియోజకవర్గ వ్యాప్తంగా అన్ని ప్రభుత్వ పాఠశాలల్లో మెరుగైన వసతులు కల్పించేందుకు కృషి చేస్తానని ఎమ్మెల్యే గాంధీ అన్నారు. ఈ కార్యక్రమంలో చింతకింది రవీందర్ గౌడ్, గణేష్ ముదిరాజ్, ఉపాధ్యాయులు, విద్యార్థులు పాల్గొన్నారు.