గచ్చిబౌలి క్లౌడ్ నైన్ కిచెన్ లో తెగిపడిన లిఫ్ట్...నలుగురు యువకులకు తీవ్ర గాయాలు

దిశ, శేరిలింగంపల్లి : లిఫ్ట్ వైర్లు తెగిపోవడంతో 5వ అంతస్తు నుంచి లిఫ్ట్ కింద పడి, అందులో ప్రయాణిస్తున్న నలుగురికి గాయాలు అయిన ఘటన గచ్చిబౌలి పోలీస్ స్టేషన్ పరిధిలో చోటుచేసుకుంది. ఆలస్యంగా వెలుగులోకి వచ్చిన ఈ ఘటనకు సంబంధించి బాధితులు తెలిపిన వివరాల మేరకు… నలుగురు స్నేహితులు కలిసి గురువారం రాత్రి డిన్నర్ చేసేందుకు గాను గచ్చిబౌలిలోని ఓ అపార్టుమెంట్ 5వ అంతస్తులో ఉన్న క్లౌడ్ నైన్ కిచెన్ సిటీ లాంజ్ కు వెళ్లారు. డిన్నర్ అనంతరం వారు తిరిగి వస్తుండగా లిఫ్ట్ లోకి ఎక్కగానే లిఫ్ట్ వైర్లు తెగిపోవడంతో 5వ అంతస్తు నుంచి లిఫ్ట్ ఒక్కసారిగా కిందపడి పోయింది. ఈ ఘటనలో లిఫ్ట్ లో ప్రయాణిస్తున్న నలుగురుకి తీవ్ర గాయాలయ్యాయి. సందీప్ (22)అనే యువకుడికి తీవ్ర గాయాలు కావడంతో పాటు కాలుకు ప్యాక్చర్ అయింది. ప్రస్తుతం వారు ఓ ప్రైవేట్ హాస్పిటల్ లో చికిత్స పొందుతున్నారు. సందీప్ తండ్రి సురేందర్ క్లౌడ్ నైన్ కిచెన్ హోటల్ యాజమాన్యం పై పోలీసులకు ఫిర్యాదు చేసినట్లు తెలిపారు. ఈ ఘటనకు సంబంధించి పూర్తి వివరాలు తెలియాల్సి ఉంది.