Lal Darwaza Bonalu : ప్రారంభమైన లాల్దర్వాజా బోనాల ఉత్సవాలు
దిశ,చార్మినార్ : తెలంగాణలో ప్రసిద్ధి చెందిన లాల్దర్వాజా బోనాల ఉత్సవాలు శాస్త్రోక్తంగా శుక్రవారం శుక్రవారం అట్టహాసంగా ప్రారంభమయ్యాయి. పాతబస్తీలో చారిత్రాత్మక నేపథ్యం కలిగిన లాల్దర్వాజా శ్రీ సింహవాహీని మహంకాళి దేవాలయం, హరిబౌళిలోని శ్రీ అక్కన్న మాదన్న మహంకాళి దేవాలయం, బంగారు మైసమ్మ దేవాలయం, మీరాలంమండి శ్రీ మహంకాళి దేవాలయం, ఉప్పుగూడ శ్రీ మహంకాళి దేవాలయం, సుల్తాన్షాహీ శ్రీ జగదాంబ దేవాలయం, బేలా ముత్యాలమ్మ దేవాలయం, గౌలిపురా కోట మైసమ్మ దేవాలయం, చాంద్రాయణగుట్ట శ్రీ కనకదుర్గ ఆలయం, దేవి దేవాలయం, అలియాబాద్ శ్రీ దర్బార్ మైసమ్మ దేవాలయం, మేకలబండ శ్రీ నల్లపోచమ్మ దేవాలయాలలో శిఖరపూజ, ధ్వజారోహణ, కలశస్థాపనతో బోనాల నవరాత్రి ఉత్సవాలకు అంకురార్పణ జరిగింది. నవరాత్రులు సందర్భంగా అమ్మవారిని సుందరంగా అలంకరించారు.
లాల్దర్వాజా బోనాల ఉత్సవాలను ప్రారంభించిన నగర పోలీస్ కమిషనర్ కె.శ్రీనివాస్ రెడ్డి..
ఆషాడమాసం బోనాల ఉత్సవాల్లో భాగంగా లాల్దర్వాజా శ్రీ సింహవాహిని మహంకాళి దేవాలయాన్ని సందర్శించిన నగర పోలీస్ కమిషనర్ కె.శ్రీనివాస్ రెడ్డి, సౌత్ జోన్ డీసీపీ స్నేహ మెహ్రా, జీహెచ్ఎంసీ చార్మినార్ జోనల్ కమిషనర్ వెంకన్నలతో కలిసి 116 వ బోనాల వార్షికోత్సవాలను ప్రారంభించారు. ఆలయ కమిటీ చైర్మన్ సి. రాజేందర్ యాదవ్ ఆధ్వర్యంలో గణపతి హోమం, సప్తశతి పారాయణం, దేవి అభిషేకం తో పాటు శిఖర పూజ, ధ్వజారోహణం తదితర ప్రత్యేక పూజలు నిర్వహించారు. అంతకుముందు తెల్లవారుజామున లాల్దర్వాజా శ్రీ సింహవాహిని మహంకాళి దేవాలయంలో అమ్మవారికి మహాభిషేకంతో పూజా కార్యక్రమాలు ప్రారంభమయ్యాయి. సింహవాహిని మహంకాళి అమ్మవారికి ఆలయ కమిటీ తరపున మాజీ చైర్మన్ మాణిక్ప్రభు గౌడ్ కుటుంబం తొలి బోనం సమర్పించింది. లాల్దర్వాజా శ్రీ సింహవాహిని మహంకాళి దేవాలయ కమిటీ చైర్మన్ సి.రాజేందర్ యాదవ్ కుటుంబ సమేతంగా కలశస్థాపన పూజలు చేశారు. ఈ కార్యక్రమంలో అడిషనల్ డీసీపీ షేక్ జహంగీర్, ఆలయ కమిటీ ప్రతినిధులు మారుతి యాదవ్, సతీష్ ముదిరాజ్,చంద్రకుమార్,మాణిక్ ప్రభు గౌడ్, కె.వెంకటేష్, జయలక్ష్మీ నారాయణ గౌడ్, విష్ణు గౌడ్, సీరా రాజ్కుమార్, సి.రాజ్కుమార్ యాదవ్, శేష్ నారాయణ, ఎ.వినోద్ కుమార్, విఠల్ తదితరులు పాల్గొన్నారు.
