మెడిసిన్ కొరతపై సర్కార్ సీరియస్
దిశ, తెలంగాణ బ్యూరో: ప్రభుత్వాసుపత్రుల్లో మందులు కొరత వేధిస్తున్నట్లు మీడియా, సోషల్ మీడియాల్లో మరోసారి వార్తలు రిపీట్ అయితే అధికారులపై చర్యలు ఉంటాయని మంత్రి హరీష్ రావు హెచ్చరించారు. గాంధీ, ఉస్మానియా, నిలోఫర్, సుల్తాన్ బజార్ మెటర్నిటీ దవాఖాన్లలో మందులన్నీ అందుబాటులో ఉండవని పదే పదే ఫిర్యాదులు ఎందుకు వస్తున్నాయంటూ మంత్రి ఆగ్రహం వ్యక్తం చేశారు. నిధులు పెంచినా ఇబ్బందులెందుకు వస్తున్నాయని ఆఫీసర్లను ప్రశ్నించారు. కొన్ని ఆసుపత్రుల్లో కనీసం విటమిన్, బీపీ, షుగర్ ట్యాబ్లెట్లు లేకపోవడంపై మండిపడ్డారు. ఈ లోపాన్ని గుర్తించేందుకు ప్రతీ టీచింగ్ ఆసుపత్రికి ఒక సీనియర్ డాక్టర్ తో కమిటీ వేస్తున్నట్లు చెప్పారు. మందుల కొరత రావడానికి ప్రధాన కారణాలను ఆ టీమ్ ఎప్పటికప్పుడు ప్రభుత్వానికి నివేదిక పంపనున్నది. టీఎస్ఎంఎస్ఐడీసీ నుంచి సకాలంలో సప్లై లేదా? ఆసుపత్రులు టైంకు ఇండెంట్ పెట్టలేకపోయారా? వంటివన్నీ పరిశీలించనున్నారు. మరోవైపు జ్వరం గోలీ నుంచి కాస్ట్ లీ మందుల వరకు అన్నీంటిని సర్కార్ దవాఖాన్లలో ప్రీగా ఇవ్వాలని ప్రభుత్వం బడ్జెట్ కేటాయిస్తుంటే , కొన్ని మందులు ఎందుకు ఇవ్వాల్సి వస్తుందనే దానిపై కూడా మంత్రి ఆరా తీశారు. మందులు కొరత అనే ముచ్చటే తనకు వినిపించకూడదని రెండు రోజుల క్రితం సూపరింటెండెంట్లతో జరిగిన టెలీ కాన్ఫరెన్స్ లో మంత్రి హరీష్రావు నొక్కి చెప్పినట్లు సమాచారం.
