జీహెచ్ఎంసీ పరిధిలోని ట్రాఫిక్​ సమస్యలపై ఫోకస్ పెట్టండి : పోలీసు ఉన్నతాధికారుల సమీక్షలో డీజీపీ

దిశ, తెలంగాణ క్రైం బ్యూరో : జీహెచ్ఎంసీ పరిధిలో ట్రాఫిక్ ​సమస్యల పరిష్కారానికి విస్తృత స్థాయిలో చర్యలు చేపట్టాల్సిన అవసరముందని డీజీపీ రవి గుప్తా అన్నారు. ఆ దిశగా అధికారులు దృష్టిని కేంద్రీకరించాలని ఆదేశించారు. గ్రేటర్​హైదరాబాద్‌లోని ట్రాఫిక్​ పరిస్థితిపై డీజీపీ రవి గుప్తా ఇవాళ తన కార్యాలయంలో సమీక్ష నిర్వహించారు. ఈ సందర్భంగా ప్రజల ట్రాఫిక్​ ఇబ్బందుల పరిష్కారానికి, ట్రాఫిక్​ క్రమబద్ధీకరణకు చేపట్టాల్సిన చర్యలపై సూచనలు చేయాల్సిందిగా పేర్కొన్నారు. విజిబుల్ పోలీసింగ్‌ను సమర్థవంతంగా అమలు చేయటంతో పాటు ట్రాఫిక్ ​సిబ్బందికి ఆధునిక శిక్షణ అందించాల్సి ఉందని అన్నారు.

గ్రేటర్​ హైదరాబాద్ ​పరిధిలోని కొత్త స్కైవాక్స్, ఫ్లై ఓవర్లతో పాటు ఇతర ట్రాఫిక్​ పరిస్థితులను వివరిస్తూ.. అధికారులు పవర్​పాయింట్ ​ప్రజంటేషన్​ ద్వారా డీజీపీకి వివరించారు. మూసీ పరివాహక ప్రాంతంలోని వంతెనల పరిస్థితి, ప్రతిపాదిత ట్రాఫిక్ ​అవగాహన కార్యక్రమాలు, శిక్షణా కేంద్రాల ఏర్పాటు గురించి తెలియ చేశారు. కాగా, సమావేశంలో వచ్చిన వేర్వేరు సిఫార్సులను వెంటనే అమల్లోకి తీసుకురావాలని ఆయన అధికారులకు సూచించారు. ఈ సమీక్షా సమావేశంలో ఇంటెలిజెన్స్​ ఛీఫ్ ​బి.శివధర్‌రెడ్డి, అదనపు డీజీపీ సంజయ్​కుమార్​ జైన్, సైబరాబాద్​ కమిషనర్​ అవినాష్ ​మహంతి, రాచకొండ కమిషనర్ ​సుధీర్‌బాబు, హైదరాబాద్​ అదనపు కమిషనర్ ​విక్రమ్‌సింగ్​ మాన్, హైదరాబాద్ ​అదనపు కమిషనర్​(ట్రాఫిక్) విశ్వప్రసాద్, ఐజీ తరుణ్​ జోషీ, తదితరులు పాల్గొన్నారు.