'ఎక్కండయో... మన TSRTC బస్సు' సాంగ్ రిలీజ్

దిశ, డైనమిక్ బ్యూరో : హైదరాబాద్‌లోని ఎంజీబీఎస్ (మహాత్మాగాంధీ బస్ స్టేషన్)లో 'తెలంగాణ ఆన్ ట్రాక్'పాటను ఆవిష్కరించారు. టీఎస్ఆర్టీసీపై రాపర్ రాము మిరియాల పాడిన పాటను ఆర్టీసీ చైర్మన్ బాజిరెడ్డి గోవర్ధన్, ఎండీ వి.సి.సజ్జనార్ ఆవిష్కరించారు. ఈ సందర్భంగా గోవర్థన్ మాట్లాడుతూ... ఆర్టీసీకి 90 ఏండ్ల చరిత్ర ఉందని ప్రజాప్రతినిధులు, మేధావులు, అధికారులు ,బ్యూరో క్రాట్స్ ఎంతోమంది​ఆర్టీసీ బస్సుల్లో ప్రయాణించారని పేర్కొన్నారు. ఆర్టీసీ సామాన్యుడి నేస్తమని.. ఆర్టీసీపై సాంగ్ రూపొందించడానికి 2 నెలలు కష్టపడ్డామని చెప్పారు. రాము మిరియాల పాడిన ఈ సాంగ్ ద్వారా ప్రజల్లోకి ఆర్టీసీ మరింత బలంగా వెళ్తుందని ఆకాంక్షించారు. ప్రైవేట్ రవాణా వ్యవస్థ పెరిగినా ఆర్టీసీని ప్రజలు ఆదరిస్తున్నారని ఎండీ సజ్జనార్ తెలిపారు. ఆర్టీసీ బస్సు గురించి ప్రజలకు తెలియజెప్పడమే 'తెలంగాణ ఆన్ ట్రాక్'సాంగ్ ఉద్దేశమన్నారు. ఆర్టీసీలో ప్రయాణించి క్షేమంగా, భద్రంగా గమ్యం చేరుకోవాలన్నారు. ఆర్టీసీతో ప్రజలకు ఉన్న అవినాభావ సంబంధాన్ని రామ్ మిరియాల ఈ పాట ద్వారా చెప్పడం గొప్ప విషయమన్నారు. అనంతరం రాము మిరియాల మాట్లాడుతూ... ఆర్టీసీ మీద పాట రాయడానికి పెద్దగా కష్ట పడలేదని.. ఆర్టీసీతో ఉన్న బంధం గుర్తు చేసుకుని పాట రాశానని చెప్పారు. మధ్య తరగతి కుటుంబానికి ఆర్టీసీ బస్సు ఓ నేస్తం అన్నారు.