కాంగ్రెస్ బీ ఫామ్‌లు పంపిణీ.. నేతల సందడితో కళకళలాడిపోతున్న గాంధీభవన్
దిశ, తెలంగాణ బ్యూరో: కాంగ్రెస్ పార్టీ అభ్యర్థులకు బీ ఫామ్‌లు అందజేస్తున్నారు. ఇప్పటికే 100 మంది అభ్యర్థులను ప్రకటించిన కాంగ్రెస్.. వాళ్ళందరికీ ఇవాళ గాంధీభవన్‌లో బీ ఫామ్‌లు అందజేస్తున్నారు. మిగిలిన 19 మందితో నేడు తుది జాబితా విడుదలయ్యే అవకాశం ఉన్నది. చాంద్రాయణగుట్ట అభ్యర్థి బోయ నగేష్‌కు, సిర్పూర్ కాగజ్ నగర్ నుంచి రావి శ్రీనివాస్, నిర్మల్ నియోజక వర్గం నుంచి శ్రీహరి రావ్ తరపున ఆయన కూతురు బీఫామ్ తీసుకున్నారు. ఇక జగిత్యాల నియోజక వర్గం నుంచి జీవన్ రెడ్డి కుమారుడు బీ ఫామ్ అందుకున్నారు. రామగుండం అభ్యర్థి మకన్ సింగ్ ఠాకూర్ బీఫామ్‌ను ఆయన కుమారులు తీసుకున్నారు. సికింద్రాబాద్ కంటోన్మెంట్ నియోజక వర్గం నుంచి గద్దర్ కూతురు వెన్నెల బీఫామ్ అందుకున్నారు. కొడంగల్ నియోజక వర్గం నుంచి రేవంత్ రెడ్డి బీ ఫామ్, కల్వకుర్తి నుంచి కసిరెడ్డి నారాయణ రెడ్డి బీ ఫామ్‌లను అందజేశారు. టీపీసీసీ వర్కింగ్ ప్రెసిడెంట్ మహేష్ కుమార్ గౌడ్, ఏఐసీసీ కార్యదర్శి రోహిత్ చౌదరీ, విశ్వనాథ్, ఉపాధ్యక్షులు నిరంజన్ తదితరులు బీ ఫామ్‌లు అందజేశారు.
