రండి.. నాతో చేతులు కలపండి : జూనియర్ ఎన్టీఆర్ పిలుపు
దిశ, వెబ్ డెస్క్ : 'జీవితం చాలా విలువైనది, రండి నాతో చేతులు కలపండి..మన దేశ భవిష్యత్తు మన యువత చేతిలోనే ఉంది' అని యంగ్ టైగర్ హీరో జూనియర్ ఎన్టీఆర్ ఎక్స్ వేదికగా విడుదల చేసిన వీడియోలో పిలుపునిచ్చారు. డ్రగ్స్ రహిత తెలంగాణపై యాంటీ నార్కోటిక్‌ టీమ్కు సహకరిస్తూ తనవంతు బాధ్యతగా ఎక్స్ వేదికగా ఎన్టీఆర్ ప్రత్యేక వీడియో విడుదల చేశారు.డ్రగ్స్ రహిత సమాజమే లక్ష్యంగా కృషి చేస్తున్న రాష్ట్ర ప్రభుత్వానికి యువత సహకరించాలంటూ వీడియోలో ఎన్టీఆర్ పిలుపునిచ్చారు. ఎంతో మంది యువత డ్రగ్స్కు ఆడిక్ట్ అయి తమ ఉజ్వల భవిష్యత్తును నాశనం చేసుకుంటున్నారని ఆయన ఆవేదన వ్యక్తం చేశారు. కొంతమంది తాత్కాలిక ఆనందం కోసమో, క్షణికమైన ఒత్తిడి నుంచి బయటపడటం కోసమో లేదంటే సహచరుల ప్రభావం వల్లనో, స్టైల్‌ కోసమో డ్రగ్స్కు ఆకర్షితులు కావడం చాలా బాధాకరమని ఆయన విచారం వ్యక్తం చేశారు. రాష్ట్రంలో ఎవరైనా డ్రగ్స్ విక్రయిస్తున్నా, కొనుగోలు చేస్తున్నా, వినియోగిస్తున్నా వెంటనే యాంటీ నార్కోటిక్స్ బ్యూరోకు సమాచారం అందించాలని సూచించారు. జూనియర్ ఎన్టీఆర్ నటించిన దేవర మూవీ ఈ నెల 27న విడుదల కాబోతుండగా, అదనపు షోలు, టికెట్ల రేట్ల పెంపునకు ఇప్పటికే ఏపీ, తెలంగాణ ప్రభుత్వాలు అనుమతులు జారీ చేయడం గమనార్హం.
ఇటీవల సీఎం రేవంత్రెడ్డి డ్రగ్స్, సైబర్ క్రైమ్పై సినీ పరిశ్రమ యువతకు అవగాహన కల్పిస్తూ రెండు నిమిషాల అవగాహన వీడియో చిత్రీకరించాలని సూచించారు. టికెట్ రేట్ల పెంపునకు అనుమతి అంటూ వచ్చే వారికి ఓ షరతుగా రేవంత్ ఈ ప్రతిపాదన చేశారు. సమాజాన్ని కాపాడుకోవాల్సిన బాధ్యత సినీ పరిశ్రమపై కూడా ఉందని తెలిపారు. రేవంత్ రెడ్డి పిలుపుకు స్పందించి పలువురు సినీ తారలు డ్రగ్స్సే నో టూ డ్రగ్స్ అంటూ వీడియోలు విడుదల చేశారు. మెగాస్టార్ చిరంజీవి, హీరో విజయ్ దేవరకొండ, సీనియర్ నటుడు మోహన్ బాబు సైతం డ్రగ్స్ రహిత తెలంగాణపై యాంటీ నార్కోటిక్‌ టీమ్కు సహకరిస్తూ వీడియో విడుదల చేశారు. డ్రగ్స్ వల్ల యువత తమ జీవితాలను నాశం చేసుకోవద్దని సూచించారు. యువత బాధ్యతగా ఉంటూ రాష్ట్ర ప్రభుత్వానికి సహకరించాలని కోరారు.
