Group-3 : గ్రూప్-3 అభ్యర్థుల కోసం సీఎం రేవంత్ రెడ్డి ట్వీట్

దిశ, డైనమిక్ బ్యూరో: తెలంగాణలో గ్రూప్-3 (Group-3) పరీక్షలు ప్రారంభమయ్యాయి. అభ్యర్థులు పరీక్ష కేంద్రాల్లోకి అనుమతించేముందు హాల్‌టికెట్, గుర్తింపు కార్డులను చెక్ చేసి పంపించారు. ఆలస్యంగా వచ్చిన పలువురిని అధికారులు అనుమతించలేదు. ఉదయం 10 నుంచి మధ్యాహ్నం 12:30 గంటల వరకు పేపర్-1, మధ్యాహ్నం 3 నుంచి సాయంత్రం 5:30 గంటల వరకు పేపర్-2 పరీక్ష జరగనుంది. 18న ఉదయం 10 నుంచి మధ్యాహ్నం 12:30 గంటల వరకు పేపర్-3 పరీక్ష నిర్వహించనున్నట్లు తెలంగాణ పబ్లిక్ సర్వీస్ కమిషన్ (TGPSC) తెలిపింది. మొత్తం 1365 గ్రూప్ -3 పోస్టుల భర్తీకి రాత పరీక్షలు నిర్వహిస్తున్నారు. రాష్ట్రవ్యాప్తంగా 5.36 లక్షల మంది అభ్యర్థులు దరఖాస్తు చేసుకున్నారు.

ఈ సందర్భంగా ముఖ్యమంత్రి రేవంత్ రెడ్డి (CM Revanth Reddy) ఆదివారం ఎక్స్ వేదికగా గ్రూప్-3 అభ్యర్థులకు విషెస్ చెప్పారు. ‘ఈ రోజు గ్రూప్ -3 పరీక్షకు హాజరవుతున్న ఉద్యోగార్థులకు హృదయపూర్వక శుభాకాంక్షలు. ఈ పరీక్షలో మీరు విజయం సాధించి.. కొలువుల కలలను సాకారం చేసుకోవాలని మనస్ఫూర్తిగా కోరుకుంటున్నాను’ అంటూ పేర్కొన్నారు.