కామారెడ్డి టికెట్ నాకు ఇవ్వండి.. గాంధీభవన్‌లో బెల్లయ్య నాయక్ ఆందోళన
దిశ, వెబ్‌డెస్క్: టీ- కాంగ్రెస్‌లో థర్డ్ లిస్ట్ ప్రకటన ప్రకంపనలు రేపుతోంది. టికెట్ ఆశించిన నేతలు.. లిస్ట్‌లో తమ పేరు లేకపోవడంతో భగ్గుమంటున్నారు. పార్టీ కోసం ఏళ్లుగా కష్టపడి పని చేస్తున్న తమను కాదని.. ఇటీవల పార్టీలోకి వచ్చిన పారాచూట్ నేతలకు టికెట్ ఇవ్వడమేంటని అధిష్టానాన్ని నిలదీస్తున్నారు. మరికొన్ని చోట్ల కాంగ్రెస్ టికెట్ ఆశావాహుల అనుచరులు, అభిమానులు ఆందోళనకు దిగుతున్నారు. కాట శ్రీనివాస్ గౌడ్‌కు టికెట్ దక్కకపోవడంతో ఆయన అనుచరులు టీపీసీసీ చీఫ్ రేవంత్ రెడ్డి ఇంటిని ముట్టడించి పెద్ద ఎత్తున ఆందోళనకు దిగారు.
ఇదిలా ఉండగానే.. టికెట్ ఆశించి భంగపడ్డ కాంగ్రెస్ సీనియర్ నేత బెల్లయ్య నాయక్ గాంధీభవన్‌లో ఆందోళనకు దిగారు. మంగళవారం గాంధీభవన్‌లోని గాంధీ విగ్రహాం ఎదుట బెల్లయ్య నాయక్ నిరసన వ్యక్తం చేశారు. రేవంత్ రెడ్డి కొడంగల్‌తో పాటు కామారెడ్డిలో రెండు చోట్ల పోటీ చేసే బదులు.. కామారెడ్డి టికెట్ తనకు ఇవ్వాలని ఆయన డిమాండ్ చేశారు. కాగా, టీపీసీసీ చీఫ్ రేవంత్ రెడ్డి కొడంగల్‌తో పాటుగా సీఎం కేసీఆర్ పోటీ చేయనున్న కామారెడ్డి నుండి సైతం బరిలోకి దిగుతోన్న విషయం తెలిసిందే.
