Breaking: తెలంగాణలో మరో టెన్త్ పేపర్ లీక్

దిశ, వెబ్‌డెస్క్: తెలంగాణలో మరో టెన్త్ పేపర్ లీకయినట్లు తెలుస్తోంది. పరీక్ష ప్రారంభమైన కొన్ని క్షణాల్లోనే వరంగల్ జిల్లాలో హిందీ పేపర్ వాట్సాప్ గ్రూపుల్లో వైరల్‌గా మారింది. నిన్న(సోమవారం) వికారాబాద్ జిల్లాలో లీకైన తెలుగు పేపర్ ఇష్యూ కొనసాగుతుండగానే.. ఇవాళ(మంగళవారం) హిందీ పేపర్ లీక్ కావడం రాష్ట్రంలో సంచలనంగా మారింది. మరోవైపు ఆదిలాబాద్ జిల్లా ఊట్నూరులో పదో తరగతి విద్యార్థుల జవాబు(ఆన్సర్) పత్రాలు అదృశ్యమవడం కలకలం రేపుతోంది. పరీక్షా కేంద్రం నుంచి ఓ ఆటోలో ఆన్సర్ పేపర్ల బండిల్స్ తరలిస్తుండగా.. పోస్టాఫీస్‌కు చేరుకునేలోపు అందులోంచి ఒక బండిల్ మిస్ అయింది.

దీనిపై స్థానిక ఊట్నూరు మండల పోలీస్ స్టేషన్‌లో కేసు నమోదు అయింది. అయితే, ఈ లీకేజీ వ్యవహారాలు రాష్ట్ర ప్రభుత్వాన్ని కంటిమీద కునుకులేకుండా చేస్తున్నాయి. టీఎస్‌పీఎస్సీ పేపర్ల దగ్గర నుంచి నేటి టెన్త్ క్లాస్ పేపర్ల వరకూ అన్నీ లీకవుతుండటంతో రాష్ట్ర ప్రభుత్వం అయోమయంలో పడింది. ఈ లీకేజీ వ్యవహారంతో టెన్త్ విద్యార్థుల్లో తీవ్ర ఆందోళన నెలకొంది. వరుసగా రెండోరోజూ పేపర్ లీక్ కావడంతో దీనిపై వెంటనే స్పందించిన ఉన్నతాధికారులు, ఉపాధ్యాయుల పనా? మరెక్కడైనా లోపం జరిగిందా? అని అనుమానిస్తున్నారు.