తెలంగాణ మహిళా విశ్వవిద్యాలయ వీసీకి ఆర్జీయూకేటీ వీసీ అభినందనలు..
దిశ, బైంసా : తెలంగాణ రాష్ట్రంలో తొలి మహిళా యూనివర్సిటీ వీసీగా నూతన బాధ్యతలు స్వీకరించిన ప్రొఫెసర్ విజ్జులతకి ఆర్జీయూకేటీ వైస్ ఛాన్స్ లర్ ప్రొఫెసర్ వెంకటరమణ అభినందన తెలియజేశారు. ఈ సందర్భంగా ఏర్పాటు చేసిన ఈ కార్యక్రమంలో వీసీ, ఉన్నత విద్యా మండలి వైస్ చైర్మన్ ప్రొఫెసర్ వెంకటరమణ మాట్లాడుతూ మహిళలకు ఉన్నత విద్య అవకాశాలు, మెరుగైన విద్యను అందించడానికి తెలంగాణ మహిళా విశ్వవిద్యాలయం ఒక ప్రధానమైన పాత్ర పోషిస్తుందని, మహిళా విశ్వవిద్యాలయం నుంచి నూతన ఆవిష్కరణలు రావాలని ఆకాంక్షించారు.
త్వరలోనే తెలంగాణ మహిళా విశ్వవిద్యాలయంతో అవగాహన ఒప్పందం కుదుర్చుకునేందుకు ప్రక్రియను ప్రారంభిస్తామని తెలియజేశారు. ఈ విశ్వవిద్యాలయంలో పూర్తిగా మహిళలే విద్యను అభ్యసించేందుకు విశ్వవిద్యాలయాన్ని ఏర్పాటు చేసిన రాష్ట్ర ముఖ్యమంత్రి కల్వకుంట్ల చంద్రశేఖర రావు, విద్యాశాఖ మంత్రి సబితా ఇంద్రరెడ్డికి ప్రత్యేక కృతజ్ఞతలు తెలియజేశారు.
