ప్రవళిక ఆత్మహత్య కేసులో కీలక మలుపు.. నిందితుడు శివరాం​కు బెయిల్​

దిశ, తెలంగాణ క్రైం బ్యూరో: సంచలనం సృష్టించిన ప్రవళిక ఆత్మహత్య కేసులో నిందితునిగా ఉన్న శివరాం రాథోడ్​కు కోర్టు శనివారం బెయిల్​మంజూరు చేసింది. ప్రవళిక ఆత్మహత్యకు శివరాం రాథోడ్​ కారకుడని పేర్కొనటానికి సరైన సాక్ష్యాధారాలు లేవని కోర్టు పేర్కొనటం గమనార్హం. ఈనెల 13న అశోక్​నగర్ ​ప్రాంతంలోని బృందావన్ ​హాస్టల్లో ప్రవళిక సీలింగ్​ ఫ్యాన్​కు ఉరి వేసుకుని ఆత్మహత్య చేసుకున్న విషయం తెలిసిందే. గ్రూప్​2 పరీక్ష వాయిదా పడటం వల్లనే ఆమె ఆత్మహత్య చేసుకుందన్న వార్త దావనంలా వ్యాపించటంతో అదే రోజు రాత్రి వేలాది సంఖ్యలో విద్యార్థులు అశోక్​నగర్​చౌరస్తా ప్రాంతంలో ఆందోళన నిర్వహించారు. దీనికి వేర్వేరు పార్టీలకు చెందిన నాయకులు, విద్యార్థి సంఘాల నేతలు సంఘీభావం ప్రకటిస్తూ నిరసనలో పాల్గొన్నారు. అప్పట్లో ఈ విషాదం రాష్ట్రవ్యాప్తంగా తీవ్ర కలకలం రేపింది. కాగా, ప్రవళిక ఆత్మహత్య చేసుకున్న మరుసటి రోజునే సెంట్రల్​జోన్​డీసీపీ వెంకటేశ్వర్లు మీడియా సమావేశాన్ని ఏర్పాటు చేసి ప్రవళిక ఆత్మహత్యకు ప్రేమ వ్యవహారమే కారణమని చెప్పారు.

శివరాం రాథోడ్ ​అనే యువకుడు ప్రేమించానని చెప్పి మరో యువతితో నిశ్చితార్థం చేసుకోవటం వల్లనే ఆమె ప్రాణాలు తీసుకుందని తెలిపారు. అసలు, ప్రవళిక గ్రూప్​2 పరీక్షకు దరఖాస్తు కూడా చేయలేదన్నారు. మంత్రి కేటీఆర్ ​కూడా ప్రవళిక ఆత్మహత్యకు ప్రేమ వ్యవహారమే కారణమని చెబుతూ ఆమె కుటుంబానికి న్యాయం చేస్తామని ప్రకటించారు. ఆ తరువాత ఆమె కుటుంబసభ్యులను తన వద్దకు పిలిపించుకుని మాట్లాడారు కూడా. అయితే, ఆ తరువాత ప్రవళిక ఒక్క గ్రూప్​2 కాకుండా గ్రూప్​1, 3, 4 పరీక్షలకు కూడా దరఖాస్తులు చేసుకున్నట్టుగా హాల్​టిక్కెట్లు వెలుగు చూడటం సంచలనం సృష్టించింది. అప్పటికే చిక్కడపల్లి పోలీసులు శివరాం రాథోడ్​పై ఐపీసీ 420, 417, 306 సెక్షన్ల ప్రకారం కేసులు కూడా నమోదు చేశారు. అతన్ని పట్టుకోవటానికి ప్రత్యేక బృందాలను సైతం రంగంలోకి దింపారు.

ఈ క్రమంలో పూణె వెళ్లిన ప్రత్యేక పోలీసుల బృందం.. శివరాం రాథోడ్​ బంధువులు కొందరిని అదుపులోకి తీసుకుని చిక్కడపల్లి పోలీస్​స్టేషన్లో నిర్భంధించింది. శివరాం రాథోడ్​ ఆచూకీ చెప్పాలంటూ పోలీసులు వారిని తమదైన శైలిలో విచారణ కూడా జరిపారు. దాంతో శివరాం రాథోడ్ ​తండ్రి నేనావత్​ కిషన్ ​రాథోడ్​ మానవ హక్కుల సంఘాన్ని ఆశ్రయించాడు. ప్రవళిక ఆత్మహత్యతో తన కుమారునికి ఎలాంటి సంబంధం లేదని పిటీషన్​దాఖలు చేశారు. ప్రవళిక ఆత్మహత్య నేపథ్యంలో వస్తున్న విమర్శల నుంచి తప్పించుకునేందుకు తన కుమారున్ని కేసులో ఇరికించారని పేర్కొన్నారు. తమ బంధువులు కొందరిని పోలీసులు అదుపులోకి తీసుకుని వేధిస్తున్నట్టుగా తెలిపారు.

ఆ మరుసటి రోజునే...

ఇదిలా ఉండగా శుక్రవారం శివరాం రాథోడ్ ​నాంపల్లిలోని 9వ మెట్రోపాలిటన్ ​మెజిస్ట్రేట్ ​కోర్టులో లొంగిపోవటానికి వచ్చాడు. ఈ క్రమంలో కోర్టుకు సరెండర్​ పిటీషన్ ​కూడా దాఖలు చేశాడు. అయితే, శివరాం రాథోడ్​ తరపున దాఖలైన సరెండర్​ పిటీషన్​లో సాంకేతిక పొరపాట్లు ఉండటంతో అది తిరస్కరణకు గురైంది. దాంతో శివరాం రాథోడ్ ​కోర్టు బయటకు రాగా.. అప్పటికే అక్కడ మాటు వేసి ఉన్న చిక్కడపల్లి పోలీసులు అతన్ని అదుపులోకి తీసుకుని పోలీస్ స్టేషన్​కు తరలించారు. శనివారం శివరాం రాథోడ్ కు గాంధీ ఆస్పత్రిలో వైద్య పరీక్షలు జరిపించిన అనంతరం కోర్టులో హాజరుపరిచారు. జ్యుడిషియల్ ​రిమాండ్ ​విధించాల్సిందిగా కోర్టును అభ్యర్థించారు.

5వేల పూచీకత్తుపై బెయిల్​...

కాగా, కోర్టు శివరాం రాథోడ్ కు 5వేల రూపాయల పూచీకత్తుపై బెయిల్​ మంజూరు చేసింది. ప్రవళిక ఆత్మహత్య చేసుకోవటానికి శివరాం రాథోడ్ ​కారణమని నిర్ధారించటానికి ఎలాంటి సాక్ష్యాధారాలు లేవని కోర్టు పేర్కొనటం గమనార్హం. ఇటువంటి పరిస్థితుల్లో శివరాం రాథోడ్​ను జ్యుడిషియల్​రిమాండ్​కు పంపించలేమన్న కోర్టు అతనికి బెయిల్​ మంజూరు చేస్తూ ఉత్తర్వులు జారీ చేసింది.