ఆ టోర్నీలో భారత టెన్నిస్ ప్లేయర్‌కు తొలి విజయం.. రికార్డు నెలకొల్పిన సుమిత్
దిశ, స్పోర్ట్స్ : ఫ్రాన్స్‌లో జరుగుతున్న మోంటె కార్లో మాస్టర్స్ టోర్నీలో భారత స్టార్ టెన్నిస్ ప్లేయర్ సుమిత్ నగాల్ అదరగొడుతున్నాడు. క్వాలిఫయర్స్‌లో సత్తాచాటి మెయిన్ డ్రాకు అర్హత సాధించిన అతను తొలి రౌండ్‌లోనూ అదే జోరు కొనసాగించి రెండో రౌండ్‌కు చేరుకున్నాడు. సోమవారం జరిగిన మెన్స్ సింగిల్స్ తొలి రౌండ్‌లో సుమిత్ 5-7, 6-2, 6-4 తేడాతో ఇటలీ ఆటగాడు, వరల్డ్ నం.35 మాటియో అర్నాల్డిని ఓడించాడు.
తొలి సెట్ కోల్పోయిన తర్వాత సుమిత్ అద్భుతంగా పుంజుకున్నాడు. ప్రత్యర్థిని నిలువరించి వరుసగా రెండు సెట్లను గెలుచుకుని మ్యాచ్‌ను కైవసం చేసుకున్నాడు. ఇటలీ ఆటగాడు 6 డబుల్ ఫౌల్ట్స్, 27 అనవసర తప్పిదాలతో మూల్యం చెల్లించుకున్నాడు. ఈ గెలుపుతో సుమిత్ అరుదైన రికార్డు నెలకొల్పాడు. టోర్నీ చరిత్రలోనే మెయిన్ డ్రాలో విజయం సాధించిన తొలి భారత ఆటగాడిగా సుమిత్ ఘనత సాధించాడు. గతంలో 1982లో రమేశ్ కృష్ణన్ తొలి రౌండ్‌లో పరాజయం పాలయ్యాడు. మంగళవారం జరిగే రెండో రౌండ్‌లో సుమిత్‌కు కఠిన ప్రత్యర్థి ఎదురయ్యాడు. డెన్మార్క్ ప్లేయర్, 7వ సీడ్ హోల్గర్ రూనెతో తలపడనున్నాడు.
