యూపీ యోధాస్‌పై తమిళ్ తలైవాస్ గెలుపు.. ప్లే ఆఫ్స్ ఆశలు సజీవం
దిశ, స్పోర్ట్స్ : ప్రొ కబడ్డీ లీగ్ 10వ సీజన్‌లో తమిళ్ తలైవాస్ ప్లే ఆఫ్స్ ఆశలను సజీవంగా ఉంచుకుంది. మంగళవారం కీలకమైన మ్యాచ్‌లో యూపీ యోధాస్‌పై 25-32 తేడాతో విజయం సాధించింది. వరుసగా రెండు ఓటముల తర్వాత ఈ విజయంతో తమిళ్ తలైవాస్ పుంజుకుంది. ఈ మ్యాచ్‌లో మొదటి నుంచి ఆ జట్టు ఆధిపత్యం ప్రదర్శించింది. ముఖ్యంగా రైడర్ నరేందర్‌తోపాటు కెప్టెన్ సాహిల్ వరుసగా పాయింట్లు సాధించారు. దీంతో ఫస్టాఫ్‌లో ఆ జట్టు 21-16తో ఆధిక్యంలో నిలిచింది. సెకండాఫ్‌లో యూపీ యోధాస్ పుంజుకునేందుకు చూసినా.. తమిళ్ తలైవాస్ పట్టు వద్దలేదు. దీంతో చివరి వరకూ ఆధిక్యం కాపాడుకున్న తమిళ్ తలైవాస్ 7 పాయింట్ల తేడాతో నెగ్గింది. నరేందర్ 10 పాయింట్లు, కెప్టెన్ సాహిల్ 6 పాయింట్లతో జట్టు విజయంలో కీలక పాత్ర పోషించారు. పాయింట్స్ టేబుల్‌లో తమిళ్ తలైవాస్ 8వ స్థానానికి చేరుకుంది. మొదటి ఆరు జట్లు మాత్రమే ప్లే ఆఫ్స్‌కు అర్హత సాధించనున్నాయి. ఇప్పటికే జైపూర్ పింక్ పాంథర్స్, పుణేరి పల్టాన్స్ నాకౌట్ రౌండ్‌కు చేరుకోగా.. మరో నాలుగు స్థానాల కోసం తీవ్ర పోటీ నెలకొంది.
