షాకింగ్ : ఎలుకల మందు తాగిన తమ్ముడు.. పెయింట్ తాగిన అక్క.. ఏమైందంటే..?

దిశ, టేకులపల్లి : భద్రాద్రి కొత్తగూడెం జిల్లా టేకులపల్లి మండల కేంద్రంలో దారుణం చోటుచేసుకుంది. డబ్బులు విషయంలో గొడవ పడి అక్కా తమ్ముడు ఇద్దరూ విడివిడిగా గురువారం ఆత్మహత్యాయత్నానికి ప్రయత్నించారు. గ్రామస్తుల కథనం ప్రకారం.. టేకులపల్లికి చెందిన ముదబోయిన లక్ష్మి, దుర్గాప్రసాద్ అక్కా తమ్ముళ్ళు. గత కొంతకాలంగా వీరిద్దరి మధ్య ఆర్థిక లావాదేవీల విషయంలో గొడవలు జరుగుతున్నాయి. అక్క లక్ష్మికి తమ్ముడు దుర్గా ప్రసాద్ కొంత డబ్బు ఇవ్వాల్సి ఉండగా.. నీకు డబ్బులు ఇచ్చేది లేదంటూ లక్ష్మి సెల్ఫోన్‌ను దుర్గా ప్రసాద్ పగులగొట్టాడు. దీంతో ఆగ్రహంతో ఊగిపోయిన లక్ష్మి తమ్ముడిని కొరికింది.

గొడవ పెద్దది కావడంతో ఇరువురు టేకులపల్లి పోలీస్‌స్టేషన్లో పరస్పరం ఫిర్యాదు చేసుకున్నారు.తర్వాత గ్రామ పెద్డ మనుషుల సమక్షంలో పంచాయితీ పెట్టించగా.. పగులగొట్టిన మొబైల్ కొనిస్తానని తమ్ముడు అక్కకు మాటిచ్చాడు. చాలా రోజులైన తనకు ఇవ్వాల్సిన డబ్బులు, సెల్ఫోన్ ఇవ్వకపోవడంతో లక్ష్మి మళ్ళీ టేకులపల్లి పోలీస్ స్టేషన్‌కు వెళ్లి ఫిర్యాదు చేసింది. పోలీసులు దుర్గా ప్రసాద్‌ను స్టేషన్‌కు రావాలని కోరగా అక్కడికి వెళ్లకుండా టేకులపల్లిలోని తన ఇంట్లో ఎలుకల మందు తాగి ఆత్మహత్యకు యత్నించాడు. దీంతో స్థానికులు అతన్ని వెంటనే కొత్తగూడెం ఏరియా హస్పిటల్‌కు తరలించి వైద్యం అందిస్తు్న్నారు. ఇక తనకు డబ్బులు ఇవ్వకుండా ఇబ్బందులకు గురిచేస్తున్నాడని మనస్తాపం చెందిన లక్ష్మి పెయింట్ తాగి ఆత్మహత్యాయత్నానికి పాల్పడింది. వెంటనే ఆమెను ఇల్లందు ప్రభుత్వ ఆసుపత్రికి తరలించి వైద్యం అందిస్తున్నారు. ప్రస్తుతం ఇరువురి పరిస్థితి నిలకడగా ఉందని గ్రామస్తులు తెలిపారు. ఈ మేరకు పోలీసులు కేసు నమోదు చేసి దర్యాప్తు చేస్తున్నట్టు పోలీసులు తెలిపారు.