ప్రభాస్ సరసన దీపికాపడుకోన్?
దిశ, హైదరాబాద్ :
డార్లింగ్ ప్రభాస్ సరసన బాలీవుడ్ సుందరి దీపికా పడుకునే నటించనుందా..? ఇలాంటి ఊహాగానాలే టాలీవుడ్‌లో హాట్ టాపిక్‌గా మారాయి. ప్రభాస్ ప్రస్తుతం రాధాకృష్ణ దర్శకత్వంలో ఓ లవ్ స్టోరీ చేస్తోన్నసంగతి తెలిసిందే. తన తర్వాతి సినిమాను ‘మహానటి’ సినిమాతో జాతీయ అవార్డు అందుకున్ననాగ్ అశ్విన్‌తో చేసేందుకు పచ్చజెండా కూడా ఊపాడు మన డార్లింగ్. దీనికి అశ్వనీదత్ నిర్మాతగా వ్యవహరించనుండగా, ఈ సినిమా రూ.200కోట్ల భారీ బడ్జెట్‌తో తెరకెక్కనుంది. బడ్జెట్‌కు తగ్గట్టుగా భారీ తరాగణాన్నితీసుకోవాలని చిత్రం బృందం ఆలోచనలో ఉంది. అందులో భాగంగానే ‘దీపికా పదుకొనే’ను సంప్రదించాలని చిత్ర యూనిట్ భావిస్తుండగా, ఆమెతో సంప్రదింపులు కూడా మొదలైనట్టు ఫిల్మ్‌నగర్ టాక్. ఒక‌వేళ అదే నిజమైతే అటు బాలీవుడ్ ఇటు టాలీవుడ్ అభిమానులకు పెద్ద పండగే అని చెప్పవచ్చు. ఇప్పటికే ఈ చిత్రానికి సంబంధించి అధికారిక ప్రకటన కూడా విడుదలైంది.ఈ సందర్బంగా డైరక్టర్ నాగ్ అశ్విన్ మాట్లాడుతూ..ఇది కేవలం పాన్ ఇండియా సినిమా కాదని, పాన్ వరల్డ్‌కు సరిపోలుతుందని పేర్కోన్నాడు. దీన్నిబట్టి చిత్రం ఎంత భారీగా ఉండనుందో అర్థమవుతోంది.
ప్రస్తుతం ప్రభాస్ చేస్తున్న ‘జాన్’ చిత్రం పూర్తవగానే ఈ సినిమా మొదలవుతుంది. నాగ్ అశ్విన్ డైరెక్ట్ చేసిన ‘మహానటి’ అతనికి మంచి పేరు తీసుకురాగా, ప్రభాస్‌తో కూడా ఈ చిత్రాన్నిఅదే స్థాయిలో గొప్పగా తెరకెక్కిస్తారని అభిమానులు ఆశిస్తున్నారు. ఈ సినిమాకి సంబంధించి ప్రీ ప్రొడక్షన్ పనులు వేగంగా జరుగుతున్నట్టు సమాచారం.ఈ ఏడాది చివర్లో సినిమా లాంచ్ చేసి వచ్చే ఏడాది చివర్లో సినిమాను విడుదల చేయాలని చిత్ర బృందం ప్లాన్ చేస్తొంది. అయితే ప్రభాస్ గత చిత్రం ‘సాహో’కు డివైడ్ టాక్ వచ్చినా కలెక్షన్ల విషయంలో మనోడి జోరు తగ్గలేదు. ఈ సినిమా ప్రభాస్‌కు బహుబలి వైభవం తెస్తుందని సినీ వర్గాల నుంచి టాక్ రాగా, అంతే స్థాయిలో కథను సిద్ధం చేస్తున్నట్టు డైరక్టర్ నాగ్ అశ్విన్ తెలిపారు.
