యడియూరప్పకు తృటిలో తప్పిన ప్రమాదం
దిశ, డైనమిక్ బ్యూరో : బీజేపీ సీనియర్ నేత, కర్ణాటక మాజీ సీఎం యడియూరప్పకు త్రుటిలో ప్రమాదం తప్పింది. సోమవారం ఉదయం ఈ ఘటన జరిగింది. యడియూరప్ప, పలువురు బీజేపీ నేతలతో కలిసి కలబురిగిలోని జేవర్జిలో ఓ కార్యక్రమానికి వెళ్లారు. జెవర్జి ప్రాంతంలో హెలికాప్టర్‌ను దించేందుకు స్థానిక అధికారులు హెలిప్యాడ్ ఏర్పాటు చేశారు. అయితే ఆ హెలిప్యాడ్‌పై చెత్తాచెదారం, ప్లాస్టిక్‌ షీట్లు పేరుకుపోయాయి. హెలికాప్టర్‌ ల్యాండ్ అయ్యేందుకు కిందకు రాగానే అవన్నీ ఒక్కసారిగా పైకి ఎగిరి ల్యాండింగ్‌కు ఇబ్బందిగా మారాయి.
దీంతో పైలట్‌ చివరి నిమిషంలో ల్యాండింగ్‌ చేయకపోవడంతో ఎలాంటి ప్రమాదం జరగలేదు. ఆ తర్వాత స్థానిక యంత్రాంగం హెలిప్యాడ్‌‌ను క్లీన్ చేసి ల్యాండింగ్‌కు వీలు కల్పించారు. అప్పటిదాకా హెలికాప్టర్‌ అక్కడే గాల్లో చక్కర్లు కొట్టింది. కొంతసేపటి తర్వాత అదే హెలిప్యాడ్‌పై సురక్షితంగా ల్యాండ్ అయ్యింది. దీనికి సంబంధించిన వీడియోలు సోషల్‌మీడియాలో వైరల్‌గా మారాయి.
