సీఎం జగన్‌కు 'Veera Simha Reddy' స్ట్రాంగ్ కౌంటర్! (వీడియో)
దిశ, వెబ్‌డెస్క్: ఎన్టీఆర్ హెల్త్ యూనివర్సిటీకి వైఎస్ఆర్ పేరు పెడుతూ వైసీపీ సర్కార్ తీసుకున్న నిర్ణయం ఏపీలో తీవ్ర దుమారం రేపిన విషయం తెలిసిందే. సర్కార్ నిర్ణయాన్ని రాజకీయాలకు అతీతంగా అందరూ ఖండించారు. సీఎం వైఎస్ జగన్ సోదరి అయిన షర్మిల సైతం వ్యతిరేకించారు. తాజాగా.. ఈ వివాదంపై నందమూరి బాలకృష్ణ మరోసారి సీఎం జగన్‌కు పరోక్ష కౌంటర్ ఇచ్చారు. ''సంతకాలు పెడితే బోర్డు మీ పేరు మారుతుందేమో కానీ.. ఆ చరిత్ర సృష్టించిన వాడి పేరు మారదు, మార్చలేరు'' అంటూ బాలయ్య 'వీరసింహారెడ్డి' ట్రైలర్‌లో చెప్పిన డైలాగ్ నెట్టింట్లో హల్‌చల్ చేస్తోంది. ఇది ఖచ్చితంగా సీఎం జగన్‌కు వేసిన కౌంటరే అంటూ ఫ్యాన్స్‌కు ట్వీట్లు చేస్తూ ఆ డైలాగ్‌ను వైరల్ చేస్తున్నారు.
అంతేగాక, ఈ డైలాగ్ ఇప్పుడు ఏపీ రాజకీయవర్గాల్లో హాట్ టాపిక్ అవుతోంది. ఏపీలో వైసీపీ ప్రభుత్వం అధికారంలోకి వచ్చిన తరువాత అనేక పథకాలకు పేర్లు మార్చింది. వాటికి వైఎస్ఆర్ పేర్లు పెట్టింది. అందులో భాగంగానే ఎన్టీఆర్ హెల్త్ యూనివర్సిటీ పేరును మార్చి వైఎస్ఆర్ హెల్త్ యూనివర్సిటీగా మార్చడం పెద్ద రచ్చ అయ్యింది. దీనిపై టీడీపీ పెద్ద ఎత్తున ఆందోళనలు చేపట్టింది. అయితే వైసీపీ ప్రభుత్వం తమ నిర్ణయాన్ని సమర్థించుకుంది. అయితే తాము మళ్లీ అధికారంలోకి వచ్చిన తరువాత హెల్త్ యూనివర్సిటీకి మరోసారి ఎన్టీఆర్ పేరు పెడతామని స్పష్టం చేసింది. అయితే ఈ వివాదాన్ని గుర్తు చేస్తూ.. వీరసింహారెడ్డిలో బాలకృష్ణ చెప్పిన డైలాగ్‌పై వైసీపీ నేతలు ఏ విధంగా స్పందిస్తారో చూడాలి.
