సెల్లార్ నీటిలో మునిగి వ్యక్తి మృతి

దిశ, ముషీరాబాద్:
సెల్లార్ లో చేరిన నీటిలో పడి ఓ వ్యక్తి మరణించిన ఘటన ముషీరాబాద్ పోలీస్ స్టేషన్ పరిధిలో చోటు చేసుకుంది. పోలీసులు తెలిపిన వివరాల ప్రకారం…. హైకోర్టులో పనిచేసే బి.రాజ్ కుమార్(54) ముషీరాబాద్ లోని శ్రీసాయి ఎన్ క్లేవ్ అపార్ట్ మెంట్ రెండవ అంతస్తులో నివాసముంటున్నాడు. ఆయన తల్లి ఇటీవల మరణించడంతో 15 రోజులుగా సెలవులో ఉన్నారు. శుక్రవారం సాయత్రం వర్షం తగ్గిన తర్వాత ప్రక్కనే ఉన్న సూపర్ మార్కెట్ కు వెళుతున్నాననీ 7:30 గంటలకు కుటుంబ సభ్యులకు చెప్పి ఇంట్లోంచి వెళ్ళాడు. మూడు గంటలైనా అతను ఇంటికి రాకపోవడంతో ఫోన్ చేయగా స్విచ్ ఆఫ్ అని వచ్చింది. దీంతో కుటుంబ సభ్యులు తీవ్ర ఆందోళనకు గురయ్యారు. సూపర్ మార్కెట్ కు వెళ్లి వెతికారు. బంధువులను తెలిసిన వారిని విచారించినా అతని ఆచూకీ తెలియలేదు. దీంతో రాత్రి 11 గంటల ప్రాంతంలో 100కు ఫోన్ చేసి పోలీసులకు సమాచారం అందజేశారు. వెంటనే ముషీరాబాద్ పోలీసులు రంగంలోకి దిగారు. జీహెచ్ఎంసీ డీఆర్ఎఫ్ సిబ్బంది, అగ్నిమాపక సిబ్బందితో కలసి అపార్ట్ మెంట్ వద్దకు చేరుకున్నారు. సెల్లార్లో నిండిన వర్షం నీటిలో వెతకగా అతను శవమై కనిపించాడు. సరుకులు తీసుకురావడానికి లిఫ్ట్ లో వచ్చి బయటికి వెళ్లేందుకు ప్రయత్నించి నీటిలో పడిపోయి మరణించి ఉంటాడని పోలీసులు అనుమానం వ్యక్తం చేస్తున్నారు. పోలీసులు కేసు నమోదు చేసి దర్యాప్తు చేస్తున్నారు.