రామమందిర ప్రాణప్రతిష్టకు స్టార్ క్రికెటర్లకు స్పెషల్ ఇన్విటేషన్
ఫీచర్స్: అయోధ్య రామమందిర ప్రాణ ప్రతిష్ట కార్యక్రమానికి ఇంకా 14 రోజుల సమయం మాత్రమే ఉంది. ఈ వేడుక కోసం శ్రీరామ్ జన్మభూమి తీర్థ్ క్షేత్ర ట్రస్ట్.. ఇప్పటికే పలువురు ప్రముఖులను ఆహ్వానించింది. కాంగ్రెస్ జాతీయ అధ్యక్షుడు మల్లికార్జున ఖర్గే.. ఈ పార్టీ అగ్ర నేత సోనియా గాంధీ, ప్రముఖ వ్యాపారవేత్తలైన ముఖేష్ అంబానీ అండ్ గౌతమ్ అదానీలకు స్పెషల్ ఇన్విటేషన్ అందించారు. అలాగే ఈ కార్యక్రమానికి రామాయణం టీవీ సీరియల్‌లో రాముడు, సీతాదేవి పాత్రల్లో నటించిన అరుణ్ గోవిల్, దీపిక చీకిలా తో పాటు ఈ సీరియల్ లో నటించిన మిగతా వారిని కూడా స్వయంగా ఆహ్వానించారట.
తాజాగా స్టార్ క్రికెటర్లు.. సచిన్ టెండూల్కర్ అండ్ విరాట్ కోహ్లిని కూడా ఆహ్వానించారు. అలాగే బాలీవుడ్ సూపర్ స్టార్ అమితాబ్ బచ్చన్ కూడా ప్రత్యేకంగా ఇన్విటేషన్ పంపించారట. ఇలా ప్రతీ ఒక్కరికీ తమ ప్రతినిధులు ఆహ్వాన కార్డు ఇస్తున్నారని, పోస్టల్, కొరియర్ ద్వారా పంపడం లేదని ట్రస్ట్ సభ్యులు స్పష్టం చేశారు. కళా రంగంలో ఉన్న ప్రతి ఒక్కరికీ ఆహ్వాన పత్రిక అందజేస్తున్నామని వెల్లడించారు. కేవలం ఇండియాలో ఉన్న వారిని మాత్రమే కాకుండా.. విదేశాల్లో ఉన్న 50 మంది అతిథులను కూడా ఇన్వైట్ చేశామని తెలిపారు.
