సీబీఐ అరెస్ట్‌పై ఢిల్లీ హైకోర్టును ఆశ్రయించిన కేజ్రీవాల్

దిశ, నేషనల్ బ్యూరో: ఢిల్లీ ఎక్సైజ్ పాలసీ కేసులో సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) తనను అరెస్ట్ చేయడాన్ని సవాల్ చేస్తూ, ఢిల్లీ ముఖ్యమంత్రి అరవింద్ కేజ్రీవాల్ సోమవారం ఢిల్లీ హైకోర్టును ఆశ్రయించారు. ఇటీవల కేజ్రీవాల్‌ను మూడు రోజుల కస్టడీకి పంపగా, అది ఈ శనివారంతో ముగిసింది. దీంతో రౌస్ అవెన్యూ కోర్టు ఆయన్ను తిరిగి జులై 12 వరకు జ్యుడీషియల్ కస్టడీకి పంపింది. ఈ నేపథ్యంలో ఆయన దీనిని వ్యతిరేకిస్తూ, హైకోర్టులో పిటిషన్ వేశారు. అంతకుముందు కేజ్రీవాల్‌ మూడు రోజుల కస్టడీ ముగిసన తరువాత సీబీఐ కోర్టులో హాజరుపరుచగా, ఆయన దర్యాప్తుకు సహకరించడం లేదని, ఉద్దేశపూర్వకంగా తప్పించుకునే సమాధానాలు ఇచ్చారని, 2021-22 మధ్య కాలంలో గోవా రాష్ట్ర ఎన్నికల కోసం తన పార్టీ ద్వారా రూ. 44.54 కోట్ల అక్రమంగా సంపాదించిన డబ్బు బదిలీ, వినియోగానికి సంబంధించిన ప్రశ్నలను కూడా ఆయన సరైన సమాధానాలు ఇవ్వడం లేదని,అలాగే ఈ కేసులో మరింత మంది సాక్షులను విచారించాల్సిన అవసరం ఉందని కేజ్రీవాల్‌ను సీబీఐ 14 రోజుల జ్యుడీషియల్ కస్టడీని కోరింది. ఎన్‌ఫోర్స్‌మెంట్ డైరెక్టరేట్ దాఖలు చేసిన మనీలాండరింగ్ కేసులో జ్యుడీషియల్ కస్టడీలో ఉన్న ఆయనను సీబీఐ జూన్ 26న అరెస్ట్ చేసింది.