JEE మెయిన్స్ 2024 పరీక్ష ఫలితాలు విడుదల
దిశ, నేషనల్ బ్యూరో: దేశంలోని ఐఐటీలు, ఎన్‌ఐటీల వంటి ప్రముఖ ఇంజనీరింగ్ కళాశాలల్లో ప్రవేశాలకు నిర్వహించే JEE మెయిన్స్ 2024 పరీక్ష ఫలితాలు తాజాగా విడుదలయ్యాయి. పరీక్షకు హాజరైన అభ్యర్థులు అధికారిక వెబ్‌‌సైట్ jeemain.nta.ac.in ద్వారా లాగిన్ వివరాలను నమోదు చేసి ఫలితాలను చూసుకోవచ్చు. ఈ పరీక్షను నేషనల్ టెస్టింగ్ ఏజెన్సీ(NTA) ఈ ఏడాది జనవరి 24 నుంచి ఫిబ్రవరి 1 వరకు నిర్వహించింది. ఇప్పటికే ఆన్సర్ కీ ని విడుదల చేయగా, ఇప్పుడు అభ్యర్థుల స్కోర్‌కార్డును అందుబాటులో ఉంచింది. ఈ పరీక్షకు మొత్తం 12,31,874 మంది అభ్యర్ధులు దరఖాస్తు చేసుకోగా, వారిలో 11.70 లక్షల మంది హాజరయ్యారు. ఈ ఫలితాల్లో హర్యానా రాష్ట్రానికి చెందిన ఆరవ్ భట్ అనే అభ్యర్థి మొదటి స్థానంలో నిలవగా, తెలంగాణకు చెందిన రిషి శేఖర్ శుక్లా రెండో స్థానంలో, ఆంధ్రప్రదేశ్‌కు చెందిన షేక్ సూరాజ్ మూడో స్థానంలో నిలిచారు.
