Delhi : తుపాకులు, కత్తులతో నలుగురు టీనేజర్ల ఎటాక్.. ఏమైందంటే..?

దిశ, నేషనల్ బ్యూరో : 16, 17 ఏళ్ల నలుగురు టీనేజర్లు తుపాకులు, కత్తులతో దేశ రాజధాని ఢిల్లీ(Delhi)లోని కిషన్‌ఘర్ ఏరియాలో చెలరేగారు. మరో ఇద్దరు టీనేజర్ల(Minors)పై విచక్షణారహితంగా దాడికి పాల్పడ్డారు. ఈ ఘటనలో 16 ఏళ్ల బాలుడు చనిపోగా, 18 ఏళ్ల సౌరభ్ యాదవ్ తీవ్ర గాయాలతో ఆస్పత్రి పాలయ్యాడు. శనివారం సాయంత్రం 5.45 గంటలకు కిషన్‌ఘర్ ఏరియాలో చోటుచేసుకున్న ఈ ఘటన వివరాలు ఆలస్యంగా ఆదివారం వెలుగులోకి వచ్చాయి.

ఇద్దరు బాధిత టీనేజర్లతో సంజయ్ మెహ్లావత్ (38) అనే యువకుడికి గొడవ జరిగినట్లు ప్రాథమిక విచారణలో పోలీసులు గుర్తించారు. సంజయ్ మెహ్లావత్ సూచనల మేరకే నలుగురు టీనేజర్లు కత్తులు, తుపాకులు తీసుకొని ఈ దాడి చేశారని వెల్లడైంది. దీంతో సూత్రధారి సంజయ్ మెహ్లావత్‌తో దాడికి పాల్పడిన నలుగురు బాలురను పోలీసులు అదుపులోకి తీసుకున్నారు. సంఘటనా స్థలాన్ని పరిశీలించిన పోలీసులు, ఫోరెన్సిక్ నిపుణులు ఒక బుల్లెట్ సహా పలు సాక్ష్యాలను సేకరించారు.