చైన్​ స్నాచింగ్​కు పాల్పడిన ఇద్దరు యువకుల అరెస్ట్

దిశ, బడంగ్ పేట్​ : చైన్​ స్నాచింగ్​కు పాల్పడి తప్పించుకు తిరుగుతున్న ఇద్దరు యువకులను పహాడీషరీఫ్​ పోలీసులు అదుపులోకి తీసుకుని బుధవారం రిమాండ్​కు తరలించారు. వారి వద్ద నుంచి మూడు తులాల బంగారు గొలుసును పోలీసులు స్వాధీనం చేసుకున్నారు. పహాడీషరీఫ్​ ఇన్​స్పెక్టర్​ గురువారెడ్డి తెలిపిన వివరాల ప్రకారం ... గత డిసెంబర్​ 30వ తేదీన ముచ్చ కాకుల సరస్వతి (56) గత డిసెంబర్​ 30వ తేదీన రాత్రి 9.30గంటలకు కిరాణ దుకాణానికి వెళ్ళింది. మార్గ మధ్యలో హీరో హోండా యాక్టివా బైక్​ పై వచ్చిన ఇద్దరు గుర్తు తెలియని వ్యక్తులు సరస్వతి మెడలో ఉన్న మూడు తులాల బంగారు గొలుసును తెంచుకుని పరారయ్యారు. దీంతో బాధితురాలు సరస్వతి పహాడీషరీఫ్​ పోలీసులకు ఫిర్యాదు చేసింది.

కేసును నమోదు చేసుకున్న పహాడీషరీఫ్​ పోలీసులు ఘటనా స్థలం పరిసర ప్రాంతాలలోని సీసీ కెమెరాలను పరిశీలించి చైన్​ స్నాచింగ్​కు పాల్పడింది తుక్కుగూడ లక్ష్మీనగర్​ కాలనీకి చెందిన గజ్జెల్లి వశిష్ఠ (19) ,బొగ్గుల అభిలాష్​ (19) లుగా గుర్తించారు. వీరిద్దరు ఫ్యాబ్​సిటీలోని రెనోసీస్​​ కంపెనీలో ప్రైవేటు​ ఉద్యోగం చేస్తున్నారు. వీరు గంజాయి, మద్యం, సిగరెట్​ వంటి చెడు అలవాట్లకు భానిసయ్యారు. వీరి సంపాదన సరిపోక పోవడంతో ఒంటరిగా ఉన్న వృద్ధ మహిళ మెడలో నుంచి బంగారు చైన్​లను దోపిడీ చేయాలని పథకం పన్నారు. ఈ నేపధ్యంలోనే సరస్వతి మెడలోంచి వశిష్ట, అభిలాష్​లు బంగారు గొలుసును కాజేసి పోలీసులకు పట్టుబట్టారు. వారి వద్ద నుంచి బంగారు గొలుసు , హోండా యాక్టివా బైక్​, ఒక సెల్​ఫోన్​తో పాటు జర్కిన్​లను పోలీసులు స్వాధీనం చేసుకున్నారు. వారిద్దరిని పహాడీషరీఫ్​ పోలీసులు అరెస్ట్​ చేసి బుధవారం రిమాండ్​కు తరలించారు. ఈ కేసును పహాడీషరీఫ్​ పోలీసులు దర్యాప్తు చేస్తున్నారు.