రామ మందిరం ప్రతిష్టాపన ప్రధాన అర్చకుడు లక్ష్మీకాంత దీక్షిత్ కన్నుమూత
దిశ, నేషనల్ బ్యూరో: అయోధ్య రామ మందిరం విగ్రహ ప్రతిష్టాపనలో ప్రధాన అర్చకుడిగా వ్యవహరించిన పండిట్ లక్ష్మీకాంత దీక్షిత్ శనివారం మరణించారు. గత కొన్ని రోజులుగా అనారోగ్యంతో బాధపడుతున్న ఆయన మంగళగూరి మొహల్లాలోని తన నివాసంలో శనివారం ఉదయం 7 గంటలకు తుదిశ్వాస విడిచినట్లు కుటుంబ సభ్యులు ఒక ప్రకటన విడుదల చేశారు. రామ మందిరం విగ్రహ ప్రతిష్టాపనలో 121 మంది వేద బ్రాహ్మణులకు ఆయన నాయకత్వం వహించారు. ఆయన నేతృత్వంలో పూజలన్నీ పూర్తయ్యాయి. కుమారుడు, ఇతర కుటుంబ సభ్యులు కూడా పూజలో పాల్గొన్నారు. ఇది కాకుండా, డిసెంబర్ 2021లో కాశీ విశ్వనాథ్ ధామ్ ప్రారంభోత్సవం పూజలో కూడా ఆయన పాల్గొన్నారు.
శనివారం ఉదయం ఆరోగ్యం పూర్తిగా క్షీణించడంతో ఆయన మరణించారు. మణికర్ణిక ఘాట్‌లో ఆయన అంత్యక్రియలు నిర్వహించనున్నారు. ఉదయం 11 గంటలకు ఆయన నివాసం నుంచి అంతిమయాత్ర బయలుదేరుతుంది. 82 ఏళ్ల పండిట్ లక్ష్మీకాంత దీక్షిత్ 1942లో మొరాదాబాద్‌లో జన్మించారు. చిన్నతనంలో శుక్లయజుర్వేద శాఖ, ఘనతలను అభ్యసించడానికి కాశీకి వచ్చారు. మహారాష్ట్ర, మధ్యప్రదేశ్, గ్వాలియర్, రాజస్థాన్ దేశంలోని ప్రధాన రాజ కుటుంబాల పట్టాభిషేకాలు ఆయన పూర్వికుల ఆధ్వర్యంలోనే జరిగాయి. అలాగే, ఛత్రపతి శివాజీ మహారాజ్ పట్టాభిషేకంలో దీక్షిత్ కుటుంబంలోని పాత తరాల వారు కూడా సహకరించారని సమాచారం. పండిట్ లక్ష్మీకాంత దీక్షిత్ మృతి వార్త తెలియగానే రామ మందిర ప్రతిష్టకు సమయాన్ని నిర్ణయించిన గణేశ్వర శాస్త్రి ద్రవిడ్ సంతాపం వ్యక్తం చేశారు.
