సీఎం కేసీఆర్కు ఎంపీ పోతుగంటి వినతి.. ఎందుకో తెలుసా?
దిశ, అచ్చంపేట: జిల్లాలోని డిండి లిఫ్ట్ ఇరిగేషన్‌లో భాగంగా వంగూరు, చారగొండ గ్రామాల రైతులకు నష్టపరిహారం అందించాలని ముఖ్యమంత్రి కేసీఆర్కు ఎంపీ పోతుగంటి రాములు వినతిపత్రం అందజేశారు. ఆదివారం ఎంపీ ‘దిశ’ మీడియా ప్రతినిధితో మాట్లాడుతూ… చాలా కాలంగా పెండింగ్‌లో ఉన్న 300 ఎకరాలకు పైగా సుమారు రూ.28 కోట్ల నిధులు మంజూరు చేయడం ఆలస్యం కావడంతో రైతులు ఇబ్బందులు పడుతున్నారని అన్నారు. అందుకే ఈ విషయాన్ని ముఖ్యమంత్రి దృష్టికి తీసుకెళ్లానని వెల్లడించారు. అలాగే డిండి కెనాల్ లిఫ్ట్ ఇరిగేషన్‌లో భాగంగా సేకరించిన భూమికి పరిహారం అందక, రైతుబంధు రాక, సాగు కష్టంగా మారిందని రైతులు తీవ్ర ఆవేదన వ్యక్తం చేశారు. వినతిపత్రం స్వీకరించిన సీఎం కేసీఆర్ సానుకూలంగా స్పందించారని త్వరలోనే రైతులకు నష్టపరిహారం అందించేలా సంబంధిత అధికారులకు ఆదేశాలు జారీ చేస్తామని ముఖ్యమంత్రి తెలిపారని ఎంపీ వివరించారు
