ఇండియాలోనే ప్రముఖ విద్యాసంస్థలకు బ్రాండ్ అంబాసిడర్‌గా శ్రీలీల..!!
దిశ, సినిమా: ఏ ముహూర్తాన టాలీవుడ్ ఇండస్ట్రీకి ఎంట్రీ ఇచ్చిందో తెలియదు కానీ.. ఏకంగా స్టార్ హీరోలు కాదు, సీనియర్ స్టార్ హీరోల సరసన అవకాశం దక్కించుకుని అతి పిన్న వయసులో స్టార్ హీరోయిన్ గా గుర్తింపు తెచ్చుకుంది బ్యూటీ శ్రీలీల. తెలుగులో ‘పెళ్లి సందడి’ సినిమాతో పరిచయమైన ఈ నటి తర్వాత రవితేజ ‘ధమాకా’ చిత్రంలో, పంజా వైష్ణవ్, నితిన్, నవీన్ పొలిశెట్టి, బాలకృష్ణ , సూపర్ స్టార్ మహేష్ బాబు వంటి అగ్ర హీరోల సరసన నటించి.. తన నటన, అందం, డాన్స్, అభినయంతో తెలుగు ప్రేక్షకుల మనసు దోచేసింది.
ముఖ్యంగా శ్రీలీల డాన్స్ గురించైతే ప్రత్యేకంగా చెప్పనక్కర్లేదు. ప్రస్తుతం ఈ అమ్మడుకు అవకాశాలు తగ్గుముఖం పట్టినప్పటికీ కెరీర్ స్టార్టింగ్ లో మాత్రం దర్శక, నిర్మాతలు శ్రీలీలను తమ సినిమాల్లో నటించమని క్యూ కట్టేవారు. స్టార్ హీరోయిన్లను సైతం పక్కకు నెట్టేసి ఏడాదిలోనే ఏకంగా ఒకేసారి 8 సినిమాల షూటింగ్ లో పాల్గొంటూ శ్రీలీల తన సత్తా చాటుకుంది. ఇందులో కొన్ని సినిమాలు బ్లాక్ బస్టర్ హిట్ అందుకోగా.. మరికొన్ని మూవీస్ మాత్రం బాక్సాఫీసు వద్ద బోల్తా పడ్డాయి. ఇదంతా పక్కన పెడితే తాజాగా ఈ బ్యూటీ గురించి సోషల్ మీడియాలో ఓ వార్త వైరల్ అవుతోంది.
ప్రముఖ విద్యాసంస్థల్లో ఒక్కటైన శ్రీ చైతన్య విద్యా సంస్థలకు ఈ హీరోయిన్ బ్రాండ్ అంబాసిడర్ గా నియమించారట. రీసెంట్ గా ఈ శ్రీ చైతన్య విద్యాసంస్థల అకాడమిక్ డైరెక్టర్ సుష్మ శ్రీ ఓ ప్రకటనలో ఈ విషయాన్ని పంచుకున్నారు. ‘‘భారతదేశంలోనే ఫస్ట్ ప్లేస్ లో ఉన్న శ్రీ చైతన్య విద్యా సంస్థలకు బ్రాండ్ అంబాసిడర్ గా టాలీవుడ్ హీరోయిన్ శ్రీలీలను నియమించడం ద్వారా మరో ముందడుగు వేసిందని’’ డైరెక్టర్ సుష్మ శ్రీ చెప్పుకొచ్చారు. ప్రస్తుతం ఈ వార్త నెట్టింట వైరల్ అవ్వగా.. టాలీవుడ్ సెన్సేషనల్ హీరోయిన్ శ్రీలీలకు శుభాకాంక్షలు తెలియజేస్తున్నారు.
