సమంత నా క్రష్: విజయ్ దేవరకొండ

దిశ, సినిమా: స్టార్ హీరోయిన్ సమంత, విజయ్ దేవరకొండ జంటగా నటించిన చిత్రం ‘ఖుషి’. శివ నిర్వాణ దర్శకత్వం వహించిన ఈ సినిమా మొదటి నుంచి మంచి బజ్ క్రియేట్ చేసుకుంది. ఇక ఇటీవల రిలీజైన ట్రైలర్ మరింత అంచనాలను పెంచింది. మురళీ శర్మ, సచిన్ ఖేడేకర్, లక్ష్మీ, అలీ, రోహిణి, వెన్నెల కిశోర్, రాహుల్ రామకృష్ణ తదితరులు కీలక పాత్రలు పోషించిన ఈ మూవీ తెలుగు, తమిళం, కన్నడ, మలయాళ, హిందీ భాషల్లో సెప్టెంబర్ 1న విడుదలకానుంది. సినిమా రిలీజ్ డేట్ దగ్గర పడుతుండడంతో చిత్రబృందం ప్రమోషన్ కార్యక్రమాలు మొదలుపెట్టింది. ఇందులో భాగంగా విలేకర్ల సమావేశానికి హాజరైన విజయ్ దేవరకొండను ‘మీ క్రష్ ఎవరు?’ అని ప్రశ్నించగా ‘సమంత రూత్ ప్రభు నా క్రష్’ అని చెప్పాడు. ఒక్కసారిగా ఈ న్యూస్ వైరల్ అయిపోయింది. రష్మిక పేరు కాకుండా విజయ్ మరో నటి పేరు చెప్పడంతో ఫ్యాన్స్ షాక్ అవుతున్నారు.