Mahesh Babu: ముఫాసా: ది లయన్ కింగ్ తెలుగు ట్రైలర్.. గూస్ బంప్స్ తెప్పిస్తున్న సూపర్ స్టార్ డైలాగ్స్
దిశ, సినిమా: ది లయన్ కింగ్ సినిమా గురించి ప్రత్యేకంగా చెప్పాల్సిన పని లేదు. 1994 వచ్చిన ఈ మూవీ భారీ కలెక్షన్లతో బాక్సాఫీసును షేక్ చేసింది. దీనికి చిన్నా పెద్ద మంత్రముగ్దులయ్యారనడంలో అతిశయోక్తి లేదు. ప్రస్తుతం ఈ సినిమాకు ప్రీక్వెల్‌గా ముఫాసా: ది లయన్ కింగ్ రాబోతుంది. బారీ జెంకిన్స్ దర్శకత్వం వహించిన అమెరికన్ మ్యూజికల్ డ్రామా చిత్రంగా తెరకెక్కుతోంది. డిసెంబర్ 20న ప్రపంచ వ్యాప్తంగా ఈ సినిమాను తెలుగు, తమిళ, హిందీ బాషల్లో విడుదల చేయబోతున్నారు. ఈ క్రమంలో.. మేకర్స్ వరుస అప్డేట్స్ ఇస్తూ ప్రేక్షకుల్లో అంచనాలను పెంచేస్తున్నారు. ఆసక్తికర విషయమేంటంటే.. ముఫాసా పాత్రకు బాలీవుడ్ స్టార్ కింగ్ షారుఖ్ ఖాన్ వాయిస్ ఇవ్వగా.. దీనికి సంబంధించిన ట్రైలర్ ఇప్పటికే విడుదలై మంచి రెస్పాన్స్‌ను దక్కించుకుంది.
తాజాగా, ముఫాసా: ది లయన్ కింగ్ తెలుగు వెర్షన్ ట్రైలర్ రిలీజ్ అయింది. ఇందులో ముఫాసాకు టాలీవుడ్ సూపర్ స్టార్ మహేష్ బాబు వాయిస్ అందించారు. ‘‘అప్పుడప్పుడు ఈ చల్లని గాలి నా ఇంటి నుంచి వచ్చే జ్ఞాపకాలను గుర్తు చేస్తూనే ఉన్నట్లు అనిపిస్తుంది. అంతలోనే మాయమవుతున్నాయి. మనం ఒక్కటిగా పోరాడాలి. నేను ఉండగా నీకు ఏం కాదు టాకర్’’ అని చెప్పే డైలాగ్స్ గూస్ బంప్స్ తెప్పిస్తున్నాయి.
అయితే ఈ ట్రైలర్‌ను మహేష్ బాబు తన ట్విట్టర్ వేదిగా విడుదల చేశాడు. ‘‘మనకు తెలిసిన, ఇష్టపడే పాత్రకు కొత్త కోణం! తెలుగులో ముఫాసా వాయిస్‌ని అందించినందుకు.. క్లాసిక్‌కి విపరీతమైన అభిమాని అయినందుకు చాలా సంతోషిస్తున్నాను. ఇది నాకు ప్రత్యేకమైనది! రాజు చిరకాలం జీవించగలడు’’ అనే క్యాప్షన్ జత చేశారు. ప్రజెంట్ ముఫాసా లోని సూపర్ స్టార్ వాయిస్ అందరినీ మెస్మరైజ్ చేస్తోంది నెటిజన్లు ఆయన చెప్పిన పవర్ ఫుల్ డైలాగ్స్‌కు ఫిదా అయిపోతున్నారు.
