Suriya: సూపర్ స్టార్ కోసం దసరా బరి నుంచి వెనక్కి తగ్గిన సూర్య.. సోషల్ మీడియాలో ప్రశంసలు!
దిశ, సినిమా: తమిళ స్టార్ హీరో సూర్య నటిస్తున్న భారీ యాక్షన్ సినిమా ‘కంగువా’. ఈ చిత్రం శివ డైరెక్షన్‌లో రాబోతుండగా.. యూవీ క్రియేషన్స్, స్టూడియో గ్రీన్ సంస్థలు నిర్మిస్తున్నాయి. అయితే ఈ మూవీ అక్టోబర్ 10న విడుదల చేయబోతున్నట్లు మేకర్స్ అధికారిక ప్రకటనను విడుదల చేశారు. కంగువా మూవీతో పాటు సూపర్ స్టార్ రజినీ కాంత్ వెట్టైయాన్ కూడా అదే రోజు రీలీజ్ కాబోతుంది. టీజీ జ్ఞానవేల్ తెరకెక్కిస్తున్న ఈ సినిమా దసరా కానుకగా రాబోతుంది. అయితే ఒకే రోజు పెద్ద హీరోల సినిమాలు వస్తుండటంతో నిర్మాతలు, అభిమానులు అయోమయంలో పడిపోయారు.
తాజాగా, సూర్య తన తమ్ముడు కార్తీ నటించిన మెయ్యళగన్ మూవీ ఆడియో లాంచ్‌కు హాజరై కంగువా వాయిదా వేస్తున్నట్లు వెల్లడించాడు. ‘‘కోలీవుడ్ ఇండస్ట్రీలో ఓ స్పెషల్ మూవీ అందించడానికి మేము రెండున్నరేళ్లకు పైగా కష్టపడ్డాం. ఇందులో దాదాపు 1000 మందితో రాత్రింబవళ్లు పని చేసి షూటింగ్ కంప్లీట్ చేశాము. టీమ్ అంతా అన్ని వాతావరణాల్లోని పరిస్థితులను తట్టుకుని నిలబడ్డారు. అయితే అక్టోబర్ 10న కంగువాతో పాటు రజినీకాంత్ వెట్టైయాన్ కూడా విడుదల కాబోతుంది.
ఆయన నాకంటే సీనియర్ 50 ఏళ్లుగా ఇండస్ట్రీలో ఉంటున్నారు ముందుగా ఆయన సినిమా వస్తేనే బాగుంటుందని అనుకుంటున్నా. ఈ విషయంలో మీరు నాకు సపోర్ట్‌గా ఉంటారని నమ్ముతున్నా. కొత్త విడుదల తేదీ త్వరలోనే ప్రకటిస్తాం. మా కష్టం వృధా కాదనేది నా గట్టి నమ్మకం’’ అని చెప్పుకొచ్చాడు. కంగువా వాయిదాపై అధికారిక ప్రకటన విడుదల కావాల్సి ఉంది. కొత్త విడుదల తేదీ ప్రకటించకపోవడంతో సూర్య ఫ్యాన్స్ నిరాశ చెందుతున్నారు. ఇక సూర్య వెనక్కి తగ్గడంతో నెటిజన్లు ఆయనపై ప్రశంసలు కురిపిస్తున్నారు.
