ఆయనకు నేను జీవితాంతం రుణపడి ఉంటా : రితికా సింగ్
దిశ, సినిమా: సూప‌ర్ స్టార్ ర‌జినీకాంత్ ప్రధాన పాత్రల్లో న‌టిస్తున్న తాజా చిత్రం ‘వెట్టయాన్‌’. తెలుగులో ‘వేట‌గాడు’ అని వ‌స్తున్న ఈ సినిమాకు జై భీమ్ ఫేమ్ టి.జె.జ్ఞానవేల్‌ దర్శకత్వం వ‌హిస్తున్నాడు. కాగా ఈ చిత్రంలో రజినీకాంత్‌తో పాటు అమితాబ్‌ బచ్చన్‌, ఫహద్‌ ఫాజిల్‌, రానా దగ్గుబాటి, మంజు వారియర్‌, రితికా సింగ్, తుషారా విజయన్‌ తదితరులు నటిస్తున్నారు. లైకా ప్రొడక్షన్స్‌ పతాకంపై నిర్మాత సుభాస్కరన్‌ ఈ చిత్రాన్ని నిర్మిస్తున్న ఈ చిత్రం తిరునెల్వేలి, కన్నియాకుమారి తదితర ప్రాంతాల్లో షూటింగ్ పూర్తిచేసుకుని, ప్రస్తుతం హైదరాబాద్‌లోని ఆర్‌ఎఫ్‌సి‌లో షూటింగ్ జరుగుతోంది. అలా మొత్తంగా ఈ సినిమా షూటింగ్ 70 నుంచి 80 శాతం మేరకు పూర్తయినట్టు ఇటీవల టీం వెల్లడించింది.
ఇక ఈ మూవీలో ‘గురు’ మూవీ ఫేమ్ రితికా సింగ్ కీ రోల్ ప్లే చేస్తుంది. ఈ సంద‌ర్భంగా సూపర్‌స్టార్‌ రజినీకాంత్‌‌కు తాను జీవితాంతం రుణపడి ఉంటానని తెలిపింది రితికా.. ‘సూపర్‌స్టార్‌ రజినీకాంత్‌లోని ప్రేమ, దయాగుణం సాటిలేనివి. అలాంటి వ్యక్తితో కలిసి పనిచేస్తున్నాను. ఈ అవకాశం కల్పించినందుకు ఆయనకు ఎప్పటికీ రుణపడి ఉంటాను’ అని తెలిపింది.
