‘బహిష్కరణ’ వెబ్ సిరీస్ పోస్టర్ రిలీజ్.. షాకింగ్ లుక్‌లో హీరోయిన్ అంజలి
దిశ, సినిమా: టాలీవుడ్ హీరోయిన్ అంజలి అందరికీ సుపరిచితమే. ఈ అమ్మడు స్టార్ హీరోల సరసన హీరోయిన్‌గా నటించి మెప్పించింది. అలాగే క్యారెక్టర్ ఆర్టి్స్ట్‌గానూ తన సత్తా చాటుతూ విభిన్న పాత్రల్లో కనిపించి తన పాపులారిటీని పెంచుకుంటోంది. ఇటీవల అంజలి విశ్వక్ సేన్ ‘గ్యాంగ్ ఆఫ్ గోదావరి’ మూవీలో కీలక పాత్రలో నటించింది. అయితే ఈ సినిమా థియేటర్స్‌లో విడుదలై యావరేజ్ టాక్‌ను తెచ్చుకుంది. ఇదిలా ఉంటే.. అంజలి సినిమాలే కాకుండా వెబ్ సిరీస్‌ల్లోనూ నటిస్తూ ప్రేక్షకులను అలరిస్తోంది. ప్రస్తుతం ఈ బ్యూటీ అనన్య నాగళ్ల, కలిసి ‘బహిష్కరణ’ వెబ్ సిరీస్ చేస్తున్నారు.
ఇప్పటికే అధికారిక ప్రకటన పోస్టర్స్ కూడా విడుదలయ్యాయి. తాజాగా, నేడు అంజలి పుట్టినరోజు కావడంతో మేకర్స్ అంజలి మోషన్ పోస్టర్‌ను విడుదల చేశారు. ఇందులో కింద కూర్చున్న అంజలి కొడవలి చేత పట్టి రౌద్రంగా కనిపించింది. ఆమె పక్కన మంటల్లో కాలిపోతున్న కుర్చీ ఉంది. ప్రస్తుతం అంజలి పోస్టర్ సోషల్ మీడియాలో ట్రెండ్ అవుతోంది. ఇక అలాంటి లుక్‌లో చూసిన ఫ్యాన్స్ ఆశ్చర్యపోతున్నారు. అయితే ఈ సిరీస్‌కు ముఖేష్ ప్రజాపతి దర్శకత్వం వహిస్తున్నాడు. ప్రశాంతి మలిశెట్టి నిర్మిస్తోంది. త్వరలోనే బహిష్కరణ ప్రముఖ ఓటీటీ సంస్థ జీ5లో స్ట్రీమింగ్ కానుందని సమాచారం.
