హైదరాబాద్‌లో బాలుడిపై లైంగిక దాడి.. నిందితుడికి జీవిత ఖైదు
దిశ, జవహర్ నగర్ : ఏడేళ్ల బాలుడిపై లైంగిక దాడి చేసి.. అనంతరం హత్య చేసిన మిస్టరీ కేసును పోలీసులు చేధించి, నిందుతుడిని కోర్టులో హాజరుపరిచారు. ఈ నేపథ్యంలో నిందితుడికి కోర్టు జీవిత ఖైదు విధించింది. ఈ ఘటన రాచకొండ పోలీస్ కమిషనరేట్ బాలానగర్ పోలీస్ స్టేషన్ పరిధిలో చోటు చేసుకుంది.
సీపీ మహేష్ భగవత్ తెలిపిన కథనం ప్రకారం.. హత్యకు గురైన బాలుడి కుటుంబం బాలాపూర్‌లో చాలాకాలంగా నివాసం ఉంటోంది. 2019, మే 8వ తేదీ రాత్రి 9గంటలకు ఏదో వస్తువు తీసుకురమ్మని అతని కుటుంబ సభ్యులు బాలుడిని సమీపంలోని దుకాణానికి పంపించారు. బాలుడు దుకాణానికి వెళ్తుండగా.. మార్గమధ్యలో ఒమర్‌బిన్ హసన్ అనే వ్యక్తి అతన్ని అడ్డగించి, నిర్మానుష్య ప్రాంతానికి తీసుకెళ్లి అతనిపై లైంగిక దాడికి పాల్పడ్డాడు.
ఆ క్రమంలో బాలుడు గట్టిగా ప్రతిఘటించడంతో బండరాయితో తల, పొట్ట భాగాలపై బలంగా మోది హత్య చేశాడు. బాలుడి కేకలకు స్థానికులు అప్రమత్తమవడంతో ఒమర్ అక్కడి నుంచి పరారయ్యాడు. బాలుడి మృతదేహాన్ని చూసి అతని తల్లిదండ్రులు తల్లడిల్లిపోయారు. స్థానిక పోలీస్ స్టేషన్‌లో ఫిర్యాదు చేయడంతో.. పోలీసులు కేసు నమోదు చేసుకున్నారు.
సీసీటీవి ఫుటేజీ ఆధారంగా నిందితుడిని ఒమర్‌బిన్ హసన్‌గా గుర్తించారు. అనంతరం సీఐ సైదులు ఆధారాలు సేకరించి నిందితుడిని అరెస్టు చేసి జ్యుడీషియల్ కస్టడీకి రిమాండ్ చేశారు. దర్యాప్తు పూర్తయిన తర్వాత కోర్టులో చార్జిషీట్ దాఖలు చేశారు. మంగళవారం ఫాస్ట్ ట్రాక్ ఎక్స్‌పెడిషియస్ డిస్పోజల్ రేప్, పోక్సో న్యాయస్థానంలో నిందితున్ని హాజరుపర్చగా జీవిత ఖైదు విధించింది.
