నీ కొరకే

నీ కోసం కవితయ్యాను నేను..

నా మనసు భావాలను - మాటలలో

వ్యక్తీకరించడం చేతగాక..

అది చూసి కవినంటున్నారు నన్ను

అక్షరాలకెంత విలువుందో కదా !

మాటలలో చెబితే విన్నంత సేపే-

అక్షరమైతే - ఆర్తి కలిగినప్పుడల్లా

కనులతో తడిమి చూసుకోవచ్చు..

అనుభూతులను నెమరు వేసుకోవచ్చు..

మధుర భావనలను భద్రపరచుకుని -

మనసైనప్పుడల్లా చదువుకోవచ్చు..

ఒంటరి తనం నన్నెప్పుడూ బాధించదేమో

నీ జ్ఞాపకాల పరంపరలు నను వీడని తోడై

నాతో ఉన్నంత వరకూ....

కానీ - బాహ్యంగా నీవు నా చెంత లేవని

చింతించకుండా - నీకై రాసుకున్న నా

కవితల భాండాగారాన్ని అప్పుడప్పుడు

చదువుకుంటూ - తన్మయత్వమవుతుంటా!

బాహ్యంగా ఉన్న దూరాన్ని చెరిపేస్తూ

త్వరగా నువు నన్ను చేరాలని

ప్రతి రోజొక కవితనై నిన్ను చేరుకుంటున్నా

నీ వల్లే కదా! నాలో ఈ కవితావేశం

నీ కొరకే కదా! ఈ అక్షర సుమార్చన!

కందాళ పద్మావతి

90108 87566