బ్లాక్ ఉమెన్ ఎక్కువగా ఆపరేషన్ ద్వారా పిల్లలను కంటున్నారు... డాక్టర్లు కావాలనే చేస్తున్నారా? ఎందుకు?
దిశ, ఫీచర్స్ : ప్రెగ్నెన్సీ స్టార్టింగ్ నుంచి మొదలు పెడితే డెలివరీ అయ్యేంత వరకు హాస్పిటల్స్ చుట్టూ తిరుగుతూనే ఉండాల్సి వస్తుంది. కాంప్లికేషన్స్ అంటూ భయపెడుతుంటే లక్షలు ఖర్చు పెట్టాల్సి వస్తుంది. అయితే తాజాగా న్యూయార్క్ అధ్యయనం ఓ వాస్తవాన్ని గుర్తించింది. నల్ల జాతి, శ్వేత జాతి గర్భిణుల మధ్య కావాలనే తేడా చూపుతున్నారని తేలింది. ఒకే రకమైన ప్రెగ్నెన్సీ జర్నీ ఉన్నా సరే బ్లాక్ ఉమెన్ కు నార్మల్ డెలివరీ కన్నా C- సెక్షన్ చేసేందుకే మొగ్గు చూపుతున్నారని తెలిపింది. దీనివల్ల శస్త్ర చికిత్స గాయాలతో జీవితాంతం బాధ పడుతున్నారని వెల్లడించింది.
న్యూజెర్సీలోని 68 ఆసుపత్రులలో దాదాపు ఒక మిలియన్ జననాలకు సంబంధించిన కొత్త నివేదిక ఈ విషయాన్ని వెల్లడించింది. ఇది పూర్తిగా పక్షపాతమని స్పష్టం చేసింది. తెల్ల జాతి స్త్రీతో పోలిస్తే నల్లజాతి తల్లి తన బిడ్డను సి-సెక్షన్ ద్వారా పొందే అవకాశం దాదాపు 25% ఎక్కువగా ఉందని కనుగొంది. ఈ సర్జరీలు ఖరీదైనవి కాబట్టి.. వైద్యులకు ఆసుపత్రుల అధిక చెల్లింపులతో ఆర్థిక ప్రోత్సాహకాలు ఇవ్వడం కూడా కారణం కావచ్చని పేర్కొంది. కాగా దీనిపై అభిప్రాయాలు వ్యక్తం చేస్తున్న నిపుణులు.. నల్లజాతి స్త్రీలు ప్రసవించే ముందు ప్రసూతి వైద్యునితో డెలివరీ ఎంపికలను సమీక్షించాలని సూచిస్తున్నారు.
