ట్రెండ్ గా మారుతున్న బేబీ బంప్ ఫోటో షూట్స్... అసలెందుకంత క్రేజ్..

దిశ, వెబ్ డెస్క్ : ఒకప్పటి కాలంలో మహిళలు గర్భీణీలు అయితే శ్రీమంతం అయ్యేదాక కూడా ఎవరికీ తమ పొట్టను కనిపించకుండా కొంగుతోనో, చున్నీతోనో కప్పి ఉంచేవారు. కానీ ఈ రోజుల్లో వివాహాలు గ్రాండ్ ఈవెంట్‌లుగా మారినట్లే బేబీ షవర్స్ కూడా గ్రాండ్ ఈవెంట్లుగానే మారుతున్నాయి. బేబీ డమ్మీ, మిల్క్ బాటిల్, డైపర్, బేబీ వైప్స్ వంటి బేబీకి సంబంధించిన ప్రతీదీ ప్రదర్శించేలా కొంతమంది ప్రజలు థీమ్ బేస్డ్ బేబీ షవర్ కోరుకుంటుంటారు. గర్భిణీల సౌకర్యాన్ని బట్టి డ్రెస్, సీటింగ్ అమరికను నిర్ణయిస్తారు. అంతే కాదండోయ్ ఈ రోజుల్లో ప్రజలు బేబీ షవర్ ఇ-ఇన్వైట్‌లలో శిశువు ఏడుపు శబ్దాన్ని కూడా ఉపయోగిస్తున్నారు. పిల్లల పెంపకానికి సంబంధించిన క్విజ్‌లు, డైపర్‌ను ఎలా ధరించాలి, పిల్లవాడు ఏడ్చినప్పుడు ఎలా శాంతపరచాలి వంటి అనేక ప్రత్యేకమైన గేమ్‌లు కూడా ఈవెంట్‌లో ఆడతారు. అలాగే కేక్ లను కూడా పాల సీసా లేదా డైపర్ ఆకారంలో తయారు చేసి సెలబ్రేట్ చేసుకుంటున్నారు.

బేబీ షవర్ ఫోటో షూట్ ఎందుకు ట్రెండ్ అవుతోంది..

బాలీవుడ్ నటీమణుల మాదిరిగానే, సాధారణ మహిళలు కూడా గర్భధారణ సమయంలో బేబీ షవర్ ఫోటోషూట్‌లు చేస్తున్నారు. దీనికి కారణం సోషల్ మీడియా. ఈ మధ్య కాలంలో చాలామంది జంటలు తమ ప్రత్యేక క్షణాలను క్యాప్చర్ చేయాలనుకుంటున్నారు. ఆ క్షణాలను వారి కుటుంబం, స్నేహితులతో పంచుకుంటున్నారు. అదే సమయంలో కొంతమంది జంటలు తమ బేబీ బంప్‌ను చూపించి ప్రజల మెప్పు పొందాలని కోరుకుంటారు. సోషల్ మీడియాలో ఎక్కడో ఒక చోట ఇదో షో చేస్తూ కనిపిస్తుంటారు. ఈ రోజుల్లో చాలా మంది జంటలు సెలబ్రిటీల లాగా బేబీ బంప్ ఫోటోలతో సోషల్ మీడియాలో ప్రెగ్నెన్సీని ప్రకటిస్తున్నారు.

సోషల్ మీడియాలో బేబీ బంప్ చూపించడం వ్యక్తిగత నిర్ణయం..

సైకియాట్రిస్ట్ డా.అవ్నీ తివారీ మాట్లాడుతూ ప్రతి మహిళ గర్భధారణ ప్రయాణం ఒక్కోలా ఉంటుంది. ఈ అందమైన ప్రయాణాన్ని పబ్లిక్‌గా చేయాలా వద్దా అనేది జంటల వ్యక్తిగత నిర్ణయం. పూర్వ కాలంలో స్త్రీలు ప్రసవించే చివరి రోజుల వరకు గర్భాన్ని దాచేవారు. నేటికీ చాలా మంది స్త్రీలు చున్నీ లేదా చీర పళ్లతో పొట్టను దాచుకుంటారు. కానీ ప్రతి స్త్రీకి ఒకే ఆలోచన ఉండదు. కొందరు తమ ప్రయాణాన్ని దాచుకోకుండా ప్రత్యేకంగా ఉండాలని కోరుకుంటారు. ఆమె తన బేబీ బంప్‌ని చూపించడానికి ఇష్టపడుతుంది.

గర్భధారణను ఎప్పుడు ప్రకటించాలి..

ఈ రోజుల్లో సోషల్ మీడియాలో వెంటనే శుభవార్తను అందరికీ చెప్పాలని ప్రజలు తహతహలాడుతున్నారు. కానీ తొందరపడి ప్రెగ్నెన్సీ ప్రకటన చేయకూడదు. జంటలు ఈ శుభవార్తను పంచుకోవాలనుకుంటే వారు 14 వారాల వరకు వేచి ఉండాల్సిందే. మెయిన్‌లైన్ హెల్త్ వెబ్‌సైట్ ప్రకారం ఆరుగురిలో ఒక మహిళ గర్భం దాల్చిన మొదటి 3 నెలల్లో గర్భస్రావానికి గురవుతుంది. అంటే గర్భం దాల్చిన మొదటి త్రైమాసికంలో 80% గర్భస్రావం అయ్యే అవకాశం ఉంది. అందుకే కచ్చితంగా 14 వారాలు వేచి చూడాలంటున్నారు నిపుణులు.

మార్కెట్ లో ట్రెండింగ్‌గా ఫోటో షూట్..

ఈ రోజుల్లో బేబీ షవర్ ఫోటోషూట్‌లు బాగా ప్రాచుర్యం పొందుతున్నాయి. ఎందుకంటే ఇప్పుడు బేబీ బంప్ ఫోటో షూట్ అనేది పెద్ద మార్కెట్‌గా మారింది. చాలా మంది నటీమణులు మెటర్నిటీ బ్రాండ్‌ల కోసం ఫోటోషూట్‌లు కూడా చేస్తారు. దాని కోసం వారు తగినంత రుసుమును కూడా తీసుకుంటారు. భారతదేశంలో మెటర్నిటీ మార్కెట్ ప్రతి సంవత్సరం 17% చొప్పున పెరుగుతోంది. ప్రసూతి దుస్తుల పరిశ్రమ విలువ రూ.2213 కోట్లు. ప్రసూతి దుస్తులలో ప్రత్యేక రకాల లోదుస్తుల నుండి ప్రెగ్నెన్సీ బెల్ట్‌లు, ప్రసూతి ప్యాంటు, టాప్స్, కుర్తీల వరకు అన్నీ ఉంటాయి.

హాలీవుడ్‌లో మొదలైన ట్రెండ్‌..

బాలీవుడ్ కంటే ముందు 1991లో హాలీవుడ్‌లో బేబీ బంప్ తో ఫోటోషూట్ సంప్రదాయం మొదలైంది. ఒక మ్యాగజైన్ కోసం న్యూడ్ బేబీ బంప్ ఫోటోషూట్ చేసిన మొదటి హాలీవుడ్ నటి డెమీ మూర్. ఆ తర్వాత బియాన్స్, బ్రిట్నీ స్పియర్స్ వంటి చాలా మంది సెలబ్రిటీలు గర్భధారణ సమయంలో అలాంటి ఫోటోషూట్‌లు చేశారు.

ఇక పోతే బాలీవుడ్ నటి రిచా చద్దా ఈ సంవత్సరం జూలైలో ఒక కుమార్తెకు జన్మనిచ్చారు. అయితే కొన్ని రోజుల క్రితం ఆమె తన బేబీ బంప్ ఫోటోషూట్ కొన్ని చిత్రాలను ఇన్‌స్టాగ్రామ్‌లో పంచుకుంది. ఈ ఫోటోలలో నటి ఒక ప్రత్యేకమైన పద్ధతిలో చీరను ధరించింది. ఆమె శరీరం పై స్త్రీలింగ శక్తిని, జీవితాన్ని చూపించే కొన్ని రేఖాగణిత చిహ్నాలు ఉన్నాయి. ఈ చిత్రాలను చూసి సోషల్ మీడియా వినియోగదారులు వాటిని చాలా ట్రోల్ చేశారు. షో - ఆఫ్ అని కూడా పిలుస్తారు. గర్భధారణ సమయంలో ఫోటోషూట్ చేసిన మొదటి మహిళ నటి రిచా మాత్రమే కాదు. దీపికా పదుకొనే, అలియా భట్, సోనమ్ కపూర్, కరీనా కపూర్ సహా పలువురు బాలీవుడ్ నటీమణులు ఈ పని చేశారు.

బేబీ షవర్ ఫోటోషూట్ ప్రీ వెడ్డింగ్ లాంటిది..

బేబీ బంప్ ఫోటోషూట్‌లు ప్రీ వెడ్డింగ్ ఫోటోషూట్‌ల వంటివి. ఈ ఫోటో షూట్ లు 7 నుంచి 9 నెలల మధ్య జరుగుతాయి. క్లయింట్లు తమ సౌలభ్యం మేరకు లొకేషన్‌ను ఎంచుకుంటారు. లొకేషన్ ఢిల్లీ - ఎన్‌సీఆర్ లేదా దాని పరిసరాలు అయితే, ప్యాకేజీలు రూ. 30 వేల నుంచి మొదలవుతాయి. అది సౌత్ ఇండియా లేదా ఇంటర్నేషనల్ లొకేషన్ అయితే దాని ధర లక్షల రూపాయలకు చేరుకుంటుంది.