ఉక్రెయిన్ శ‌ర‌ణార్థుల కోసం 15 ఏళ్ల ఇండియ‌న్ టీన్ స‌రికొత్త యాప్, ఏంటీ ప్ర‌త్యేక‌త..?!
దిశ, వెబ్‌డెస్క్ః రష్యా, ఉక్రెయిన్ మధ్య నెలకు పైగా యుద్ధం కొనసాగుతోంది. యుద్ధం కారణంగా లక్షలాది మంది ప్రజలు నిరాశ్రయులయ్యారు. వాళ్లంతా ఇతర దేశాలలో శరణార్థులుగా మారాల్సి వచ్చింది. అయితే, ఈ శరణార్థులకు సహాయం చేయడానికి, 15 ఏళ్ల ఓ భారతీయ బాలుడు యాప్‌ను రూపొందించాడు. ఉక్రేనియన్ శరణార్థులు వారికి అవసరమైన సహాయాన్ని పొందుకోడానికి ఈ యాప్‌ను ఉపయోగించవచ్చు. అయితే, ఈ యాప్‌ను అభివృద్ధిచేసింది సెక్వోయా ఇండియా మేనేజర్ అయిన జి.వి.రవిశంకర్ కుమారుడు తేజస్. అనుభ‌వ‌మున్న మంచి సాఫ్ట్‌వేర్ ఇంజనీర్లే యాప్‌ను రూపొందించడానికి నెలల సమయం తీసుకుంటే, తేజస్ మాత్రం ఈ యాప్‌ను కేవలం రెండు వారాల్లోనే సిద్ధం చేయ‌డం విశేషం. తేజస్ రూపొందించిన ఈ యాప్ ఇప్పుడు గూగుల్ ప్లేస్టోర్‌లోనూ అందుబాటులో ఉంది. ఇక, దీని లింక్‌ని తేజస్ స్వయంగా ట్వీట్ చేశాడు.
సాఫ్ట్‌వేర్ డెవలపర్ తేజస్ రూపొందించిన ఈ యాప్‌లో అనేక ప్రత్యేకతలు ఉన్నాయి. ఇందులో శరణార్థులకు సమీపంలో సహాయ స్థావ‌రాలు ఎక్క‌డున్నాయో స‌మ‌గ్ర స‌మాచారం ఉంటుంది. మొత్తం ప్రపంచం మ్యాప్‌లో వీటిని వెతికే అవ‌కాశం ఉంటుంది. జాతీయ గుర్తింపు కార్డు-ఆధారిత ధృవీకరణ సౌకర్యాలు, ఆహారం, బస చేయడానికి సురక్షితమైన స్థలాలు, ప్రపంచవ్యాప్తంగా అందిస్తున్న మందులు వంటి వివిధ అవసరాలను తీర్చడానికి ఓ జాబితా సిద్ధం చేసి, ఇందులో పొందుప‌రిచారు. ఇక, ఆపదలో ఉన్న వ్యక్తి ఈ యాప్‌ని వినియోగించుకొని, కేవలం రెండు క్లిక్‌లలో సహాయం పొందవచ్చని తేజస్ తన ట్వీట్‌లో రాశాడు. ఈ యాప్ ఇంగ్లీషుతో పాటు 12 ఇతర భాషల్లో కూడా పని చేస్తుంది. ఈ సంద‌ర్భంగా తేజస్ తండ్రి జి.వి.రవిశంకర్ తన కుమారుడి విజ‌యాన్ని ట్విటర్‌లో పంచుకున్నారు, ప్రశంసించారు. ఇంతకు మించి క‌ష్ట‌ప‌డాల‌ని కొడుకును కోరాడు.
More power to the younger generation! They decide to not debate but act. Keep building @XtremeDevX!
— G V Ravi Shankar (@gvravishankar) March 31, 2022
Please RT to help create impact! https://t.co/EE8wdGfkbQ
