బండి సంజయ్‌పై ధర్మపురి బీజేపీ నేత సంచలన వ్యాఖ్యలు
దిశ, వెబ్ డెస్క్: బీజేపీ రాష్ట్ర అధ్యక్షులు బండి సంజయ్‌పై ధర్మపురి బీజేపీ ఇన్‌చార్జ్ కన్నం అంజయ్య సంచలన వ్యాఖ్యలు చేశారు. మంగళవారం మీడియాతో మాట్లాడుతూ.. బండి సంజయ్ దళితులపై వివక్ష చూపుతున్నారని మండిపడ్డారు. దళితులకు పదవులు రాకుండా అడ్డుకుంటున్నారని ఆరోపించారు. ఇతర పార్టీల నుంచి వచ్చిన వాళ్లకు పదవులు ఇస్తున్నారని బీసీ నాయకుడిగా ఉండి, దళితులకు పదవులు ఇవ్వరా అని ప్రశ్నించారు. డబ్బులు ఇచ్చేవారికే సంజయ్ మద్దతు ఉంటోందని వ్యాఖ్యలు చేశారు. బండి సంజయ్‌పై బీజేపీ అధిష్టానానికి ఫిర్యాదు చేశామని తెలిపారు.
బండి వ్యక్తిగత అజెండాతో పనిచేస్తున్నారని పేర్కొన్నారు. దళితులను కావాలనే అణదొక్కుతున్నారని ఆగ్రహం వ్యక్తం చేశారు. నిన్న మొన్న వచ్చిన వారు జాతీయ నాయకులవుతారా అంటూ మండిపడ్డారు. ‘కడుపు మండి మాట్లాడుతున్నా.. కరీంనగర్ కోర్టు చౌరస్తాలో ఎంతమంది దళితులకు పదవులు ఇచ్చావో తేల్చుకుందాం’ అంటూ సవాల్ విసిరారు. కవితపై బండి సంజయ్ వ్యాఖ్యలను తీవ్రంగా ఖండిస్తున్నామన్నారు. దళితుల మధ్యలో వివేక్ విభేదాలు తెస్తున్నారని కన్నం అంజయ్య విరుచుకుపడ్డారు.
