మరో స్వాతంత్య్ర పోరాటం చేద్దాం.. కదలిరండి: నానా పటోలే

ముంబై: కేంద్రం తప్పుడు విధానాలపై పోరాడేందుకు యువత ముందుకు రావాలని మహారాష్ట్ర కాంగ్రెస్ చీఫ్ నానా పటోలే పిలుపునిచ్చారు. దీనిని ‘స్వేచ్ఛ కోసం పోరాటం’గా అభివర్ణించారు. స్వాతంత్య్ర యోధుడు బాలగంగాధర్ తిలక్ వర్ధంతి సందర్భంగా నిర్వహించిన ఓ కార్యక్రమంలో నానా పటోలే పాల్గొని మాట్లాడారు. మోడీ ప్రభుత్వం ప్రజల నుంచి స్వేచ్ఛను లాగేసుకుంటున్నదని ఆరోపించారు. దేశ స్వాతంత్రం కోసం ఏమాత్రం పోరాడని వ్యవస్థలో బీజేపీ ఓ భాగమని వ్యాఖ్యానించారు.

“స్వాతంత్య్రానికి ముందు బ్రిటీష్ వాళ్లకు వ్యతిరేకంగా రాశారని లోక్‌మాన్య తిలక్‌పై కేసులు పెట్టారు. ఇప్పుడున్న పరిస్థితీ అలాగే ఉంది. మోడీ ప్రభుత్వం మీడియాను లక్ష్యంగా చేసుకుంది. మనం మరోసారి స్వాతంత్య్రం కోసం పోరాడాల్సిన అవసరం ఉంది. నేను ఇటీవల ఓ కశ్మీర్ యువకుడిని కలిశాను. యూపీఎస్సీ ఉద్యోగానికి రాజీనామా చేసినట్టు చెప్పాడు. ముస్లిం అయినందునే రాజీనామా చేయాల్సి వచ్చిదంటూ కేంద్రాన్ని నిందించాడు” అంటూ నానా పటోలే చెప్పుకొచ్చారు. కేంద్రానికి వ్యతిరేకంగా మరో స్వాతంత్య్ర పోరాటం చేయడానికి దేశ యువత కాంగ్రెస్‌లో చేరాలని పిలుపునిచ్చారు.