UPSC Notification : మంత్రిత్వ శాఖలలో డైరెక్ట్ ఆఫీసర్ అయ్యే అవకాశం.. షరతులు వర్తిస్తాయి..

దిశ, ఫీచర్స్ : యూనియన్ పబ్లిక్ సర్వీస్ కమిషన్ (UPSC) అధికారి స్థాయి ఉద్యోగాల కోసం డైరెక్ట్ రిక్రూట్‌మెంట్‌ను జారీ చేసింది. ఇందులో సెక్రటరీ, డిప్యూటీ సెక్రటరీ, డైరెక్టర్ పోస్టులు ఉన్నాయి. ఈ రిక్రూట్‌మెంట్‌లు 24 కేంద్ర మంత్రిత్వ శాఖలలో జరుగనున్నాయి. దీని కోసం ప్రైవేట్ రంగ ఉద్యోగులతో సహా ఇతర వ్యక్తులందరి నుంచి దరఖాస్తులను సేకరించనున్నారు. UPSC విడుదల చేసిన ఈ పోస్టులలో 10 జాయింట్ సెక్రటరీ పోస్టులు, 35 డైరెక్టర్/డిప్యూటీ సెక్రటరీ పోస్టులు ఉన్నాయి. జాయింట్ సెక్రటరీ పోస్టుల కోసం ఆహ్వానించిన దరఖాస్తుల్లో ఆర్థిక మంత్రిత్వ శాఖలో రెండు పోస్టులు, హోం మంత్రిత్వ శాఖ, ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖలో ఒక్కొక్కటి ఉన్నాయి.

అలాగే డైరెక్టర్/డిప్యూటీ సెక్రటరీ పోస్టుల కోసం కోరిన దరఖాస్తుల్లో వ్యవసాయ మంత్రిత్వ శాఖలో 8 పోస్టులు, విద్యా మంత్రిత్వ శాఖలో 2 పోస్టులు, విదేశీ వ్యవహారాల మంత్రిత్వ శాఖ, పౌర విమానయాన మంత్రిత్వ శాఖలో ఒక్కో పోస్ట్ ఉన్నాయి. యుపీఎస్‌సీ విడుదల చేసిన నోటిఫికేషన్‌లో ఈ నియామకాలు కాంట్రాక్ట్ ప్రాతిపదికన జరుగుతాయని, దీని వ్యవధి మూడేళ్లుగా ఉంటుందని పేర్కొంది. అయితే పనితీరు, అవసరాన్ని బట్టి, ఒప్పందాన్ని 5 సంవత్సరాల వరకు పొడిగించవచ్చు.

అనుభవం, వయోపరిమితి ఎంత ?

యూపీఎస్సీ ప్రకారం జాయింట్ సెక్రటరీ స్థాయి పోస్టులకు కనీస అనుభవం 15 ఏళ్లు కాగా, డైరెక్టర్ స్థాయి పోస్టులకు కనీస అనుభవం 10 ఏళ్లు, డిప్యూటీ సెక్రటరీ స్థాయి పోస్టులకు 7 ఏళ్ల అనుభవం ఉండాలి. ఇక వయోపరిమితి విషయానికి వస్తే జాయింట్ సెక్రటరీ స్థాయి పోస్టులకు వయోపరిమితి 40 నుంచి 55 సంవత్సరాల మధ్య ఉండాలి. డైరెక్టర్ స్థాయి పోస్టులకు వయోపరిమితి 35 నుంచి 45 సంవత్సరాలు, డిప్యూటీ సెక్రటరీ స్థాయి పోస్టులకు 32 సంవత్సరాల నుంచి 40 సంవత్సరాల వరకు ఉండాలి.

ఎవరు దరఖాస్తు చేసుకోవచ్చు ?

ప్రస్తుతం ఏదైనా రాష్ట్ర ప్రభుత్వం, ప్రభుత్వ రంగ సంస్థలు (పీఎస్‌యులు), స్వయంప్రతిపత్తి సంస్థలు, చట్టబద్ధమైన సంస్థలు, విశ్వవిద్యాలయాలు, పరిశోధనా సంస్థలు, ప్రైవేట్ రంగ సంస్థలు, కన్సల్టెన్సీ సంస్థలు, అంతర్జాతీయ సంస్థల్లో పనిచేస్తున్న సమానమైన అధికారులు, తత్సమాన స్థానాల్లో పనిచేస్తున్న అధికారులు మాత్రమేనని UPSC పేర్కొంది. బహుళజాతి సంస్థలు ఈ పోస్టులకు దరఖాస్తు చేసుకోవడానికి అర్హులు. కేంద్ర ప్రభుత్వ ఉద్యోగులు ఈ పోస్టులకు దరఖాస్తు చేసుకోవడానికి అర్హులు కాదు.

ఈ పోస్టులకు దరఖాస్తు చేసుకోవాలనుకునే అభ్యర్థులెవరైనా UPSC అధికారిక వెబ్‌సైట్ www.upsconline.nic.in ని సందర్శించి సెప్టెంబర్ 17 వరకు దరఖాస్తు చేసుకోవచ్చు.