2021 ఐసీసీ వరల్డ్ కప్ సూపర్ లీగ్ షెడ్యూల్ రిలీజ్

దిశ, స్పోర్ట్స్ : ఐసీసీ ప్రతీ నాలుగేళ్లకు నిర్వహించే వన్డే వరల్డ్ కప్‌కు అర్హత సాధించాలంటే టీమ్ ర్యాంకింగ్ ఆధారంగా నిర్ణయం జరిగేది. ఐసీసీ వన్డే ర్యాంకింగ్స్‌లో టాప్ 8 జట్లను వన్డే వరల్డ్ ‌కప్‌ ఆడటానికి అనుమతించేవాళ్లు. దాంతో పాటు మరో నాలుగు జట్లను క్వాలిఫయింగ్ మ్యాచ్‌ల ద్వారా తీసుకునే వాళ్లు. కాగా, ఇండియాలో 2023లో జరిగే వన్డే వరల్డ్ కప్ కోసం మాత్రం ప్రతీ జట్టు అర్హత సాధించాల్సి ఉన్నది. ఇండియాలో జరుగనున్న వరల్డ్ కప్‌లో కనీసం 13 జట్లు ఆడే అవకాశం ఉన్నది. ఈ జట్లన్నీ రాబోయే రెండేళ్లలో ఐసీసీ వరల్డ్ కప్ సూపర్ లీగ్ ఆడాల్సి ఉన్నది. సూపర్ లీగ్ అంటే ప్రత్యేకంగా నిర్వహించే టోర్నీ కాదు. ప్రస్తుతం వరల్డ్ టెస్ట్ చాంపియన్‌షిప్ ఫైనల్ చేరడానికి ఎలాగైతే ద్వైపాక్షిక సిరీస్‌ను ఉపయోగించుకుంటున్నారో.. వన్డే ద్వైపాక్షిక సిరీస్‌లనే సూపర్ లీగ్‌ పాయింట్ల కోసం వాడుకోనున్నట్లు ఐసీసీ ఇప్పటికే స్పష్టం చేసింది. సూపర్ లీగ్ ద్వారా 8 జట్లను వన్డే వరల్డ్ కప్ కోసం ఎంపిక చేస్తారు.

ఇలా అర్హత..

వరల్డ్ కప్ సూపర్ లీగ్ మ్యాచ్‌లు గత ఏడాది ఇండియా-ఆస్ట్రేలియా వన్డే సిరీస్ నుంచి ప్రారంభమయ్యింది. ఆ సిరీస్‌ను టీమ్ ఇండియా 1-2 తేడాతో ఓడిపోయింది. అయితే ఐసీసీ సూపర్ లీగ్ పాయింట్లను మ్యాచ్‌ ఆధారంగా నిర్ణయిస్తుంది. మ్యాచ్ గెలిస్తే 10పాయింట్లు, టై అయితే చెరి ఐదు పాయింట్లు, ఓడితే 0 పాయింట్లు లభిస్తాయి. 2023 వరల్డ్ కప్ కటాఫ్ తేదీ నాటికి టాప్ 8లో ఉన్న సూపర్ లీగ్ జట్లు అర్హత సాధిస్తాయి. కాగా, 2023లో ఇండియా వరల్డ్ కప్‌కు ఆతిథ్యం ఇస్తుండటంతో ఇప్పటికే అర్హత సాధించింది. సూపర్ లీగ్ ద్వారా మిగిలిన 7 జట్లను నిర్ణయిస్తారు. సూపర్ లీగ్‌లో అర్హత సాధించని జట్లు తప్పకుండా వరల్డ్ కప్ క్వాలిఫయర్స్ ఆడాల్సి ఉంటుంది. క్వాలిఫయర్స్ నుంచి 5 జట్లను వరల్డ్ కప్ కోసం ఎంపిక చేస్తారు. మొత్తం 13 జట్లు 2023 వరల్డ్ కప్ ఆడతాయని ఐసీసీ స్పష్టం చేసింది. ప్రస్తుతం ఈ ఏడది జరిగే వరల్డ్ కప్ సూపర్ లీగ్ మ్యాచ్‌ల షెడ్యూల్‌ను ఐసీసీ విడుదల చేసింది. ఇవన్నీ ఫ్యూచర్ టూర్ ప్రోగ్రాంలో భాగంగా జరుగనున్న ద్వైపాక్షిక వన్డే సిరీస్‌లే.

ఇదీ షెడ్యూల్

వెస్టిండీస్ Vs శ్రీలంక

మార్చి 10 – తొలి వన్డే – నార్త్ సౌండ్
మార్చి 12 – 2వ వన్డే – నార్త్ సౌండ్
మార్చి 14 – 3వ వన్డే – నార్త్ సౌండ్

న్యూజీలాండ్ Vs బంగ్లాదేశ్

మార్చి 20 – తొలి వన్డే – డునేదిన్
మార్చి 23 – 2వ వన్డే – క్రైస్ట్ చర్చ్
మార్చి 26 – 3వ వన్డే – వెల్లింగ్టన్

ఇండియా Vs ఇంగ్లాండ్

మార్చి 23 – తొలి వన్డే – పూణే
మార్చి 26 – 2వ వన్డే – పూణే
మార్చి 28 – 3వ వన్డే – పూణే

సౌత్ఆఫ్రికా Vs పాకిస్తాన్

ఏప్రిల్ 2 – తొలి వన్డే – సెంచూరియన్
ఏప్రిల్ 4 – 2వ వన్డే – జొహెన్నస్‌బర్గ్
ఏప్రిల్ 7 – 3వ వన్డే – సెంచూరియన్

ఇంగ్లాండ్ Vs పాకిస్తాన్

జులై 8 – తొలి వన్డే – కార్డిఫ్
జులై 10 – 2వ వన్డే – లండన్
జులై 13 – 3వ వన్డే – బర్మింగ్‌హామ్

ఐర్లాండ్ Vs సౌత్ఆఫ్రికా

జులై 11 – తొలి వన్డే – డబ్లిన్
జులై 13 – 2వ వన్డే – డబ్లిన్
జులై 16 – 3వ వన్డే – డబ్లిన్

ఐర్లాండ్ Vs జింబాబ్వే

అగస్టు 6 – తొలి వన్డే – బెల్‌ఫాస్ట్
అగస్టు 8 – 2వ వన్డే – బెల్‌ఫాస్ట్
అగస్టు 11 – 3వ వన్డే – బెల్‌ఫాస్ట్