‘జై భీమ్’ అరుదైన రికార్డ్.. ఐఎండీబీలో (IMDB) రేటింగ్స్‌లో టాప్..
దిశ, సినిమా: దేశంలో గవర్నమెంట్, పోలీసులు చేస్తున్న మోసాలను ఎత్తిచూపుతూ, సామాజిక బాధ్యతను గుర్తుచేసిన సినిమా ‘జై భీమ్’. తమిళ స్టార్ హీరో సూర్య లాయర్‌గా టి.జె. జ్ఞానవేల్ దర్శకత్వంలో ఎలాంటి కమర్షియల్‌ ఎలిమెంట్స్‌కు తావులేకుండా సింపుల్‌ బడ్జెట్‌తో తెరకెక్కిన ఈ చిత్రం.. తాజాగా ఐఎండీబీలో రేటింగ్స్‌లో హాలీవుడ్ క్లాసిక్ హిట్ ‘ది షాషాంక్ రిడంప్షన్’ మూవీని అధిగమించి రికార్డ్ క్రియేట్ చేసింది.
1994లో విడుదలైన ‘ది షాషాంక్ రిడంప్షన్’ సినిమా ఇప్పటివరకు ఐఎండీబీ సినిమాల జాబితాలో టాప్‌లో (2.5 మిలియన్ల ఓట్లతో 9.3 రేటింగ్‌తో) ఉంది. కానీ తాజాగా రిలీజైన జై భీమ్ చిత్రం 73 వేలకు పైగా ఓట్లతో 9.6 రేటింగ్‌ సాధించి టాప్ ప్లేస్‌కు చేరుకుంది. దీంతో హీరో సూర్య కంటెంట్ ప్రాధాన్యమున్న సినిమాలతో అనేక ప్రయోగాలకు శ్రీకారం చుట్టడమే కాదు కమర్షియల్‌గా సూపర్‌ సక్సెస్‌ అవుతున్నారంటూ ఫ్యాన్స్ అభినందనలు తెలుపుతున్నారు.
