ఆహారం తింటూ టీ, కాఫీలు తాగుతున్నారా.. ప్రమాదంలో పడ్డట్టే..

దిశ, ఫీచర్స్ : ప్రస్తుత కాలంలో చాలామంది బిజీ లైఫ్ ను గడుపుతుంటారు. దీంతో వారి ఆహార విధానాలను కూడా మార్చేసింది. ఆఫీసు, ఇతర పనుల్లో బిజీగా ఉండే వ్యక్తులు తమ ఆహారాన్ని త్వరగా తింటుంటారు. దీని వల్ల శరీరంలో పోషకాలు సరిగా అందవు. ఈ రోజుల్లో రెడీ టు ఈట్ ఫుడ్స్ ట్రెండ్‌లో ఎక్కువగా ఉన్నాయి. అందుకే ప్రజలు తమ ఆహారం విషయంలో జాగ్రత్తగా చూసుకోలేకపోతున్నారు. కొందరు వ్యక్తులు ఖచ్చితంగా తమ ఆహారంతో పాటు టీ లేదా కాఫీని కోరుకుంటారు.

సాధారణంగా ప్రజలు కాఫీ లేదా టీతో ఏదైనా తినడానికి ఇష్టపడతారు. కొంతమంది చిరుతిళ్లు తింటే కొంతమంది వాటితో ఆహారం తీసుకుంటారు. ఇది రుచిని పెంచుతుందని, ఆహారం జీర్ణం కావడానికి సహాయపడుతుందని ప్రజలు నమ్ముతారు. ఈ రెండు పానీయాలు లేకుండా అల్పాహారం అసంపూర్ణంగా భావిస్తారు. అయితే ఆహారంతో పాటు టీ లేదా కాఫీ తాగడం ఆరోగ్యంతో ఆడుకున్నట్లే అంటున్నారు పోషకాహార నిపుణులు.

కాఫీ, టీ తాగడం ఆరోగ్యకరం కాదు..

ఆహారంతో పాటు టీ లేదా కాఫీ తాగటం చాలామంది చేస్తున్న పొరపాటు. ఆహారంతో పాటు టీ, కాఫీలు తాగడం వల్ల ఆహారంలోని పోషకాలు శరీరంలోకి సరిగా అందవని నిపుణులు చెబుతున్నారు. ముఖ్యంగా టీ, కాఫీ ఐరన్ శోషణకు ఆటంకం కలిగిస్తాయి. పాలీఫెనాల్స్, టానిన్లు వంటి సమ్మేళనాలు రెండింటిలోనూ కనిపిస్తాయి.

ఏ సమయంలో టీ లేదా కాఫీ తాగాలి..

అయితే ఈ రెండింటినీ ఆహారంతో పాటు తాగడం ఆరోగ్యానికి హానికరం, కానీ వాటికి దూరంగా ఉండటం కూడా అంత సులభం కాదు. టీ, కాఫీ తాగడానికి సరైన సమయం ఏది అనేది గుర్తుంచుకోవాలి. ఖాళీకడుపుతో టీ, కాఫీలు తాగకూడదని నిపుణులు చెబుతున్నారు. ఇది గ్యాస్, ఉబ్బరం లేదా యాసిడ్ రిఫ్లక్స్ వంటి సమస్యలను కలిగిస్తుంది. నిపుణుల అభిప్రాయం ప్రకారం మీరు ఆహారం తిన్న అరగంట తర్వాత మాత్రమే టీ లేదా కాఫీ తాగాలి. ఉదయం పూట బిస్కెట్లు లేదా ఇతర స్నాక్స్‌తో టీ తాగండి.