అర్ధరాత్రి టెంట్ హౌస్‌లో మంటలు.. ఏం జరిగిదంటే?
దిశ, చేవెళ్ల : టెంట్ హౌస్‌కు నిప్పంటుకొని పూర్తిగా కాలి బూడిదైన సంఘటన శంకర్‌పల్లి మండలం జనవాడ గ్రామంలో గురువారం అర్ధరాత్రి చోటు చేసుకుంది. వివరాల్లోకి వెళ్లితే.. జనవాడ గ్రామానికి చెందిన తలారి భాగయ్య టెంట్ హౌస్ నడుపుకుంటూ జీవనం సాగిస్తున్నాడు. ప్రతి రోజు మాదిరిగానే భాగయ్య కుమారుడు శివ గురువారం సాయంత్రం దుకాణానికి తాళం వేసి ఇంటికి వెళ్ళాడు. అందరూ నిద్ర లేచాక శుక్రవారం తెల్లవారుజామున మూడు గంటల సమయంలో దుకాణంలో నుంచి పొగలు వస్తున్నాయంటూ స్థానికులు సమాచారం ఇచ్చారు.
దీంతో భాగయ్య కుటుంబ సభ్యులు హుటాహుటిన దుకాణం వద్దకు వెళ్లి మంటలు ఆర్పడానికి ప్రయత్నించారు. అప్పటికే దుకాణంలో పెద్దఎత్తున పొగలు లేచి టెంట్ హౌస్ సామాను కాలి పోయింది. మూడు గంటలపాటు శ్రమించి మంటలను ఆర్పడానికి ప్రయత్నించినా ఫలితం లేదని బాధితులు వాపోతున్నారు. టెంట్ హౌస్ లోని వంట సామాగ్రి డేగులు కూడా మంటల్లో పూర్తిగా కాలిపోయాయి. రాగి పాత్రలు కావడంతో మంటల్లో డేగులు కాలి కరిగిపోయాయి. సుమారు రూ.25 లక్షల వరకు ఆస్తి నష్టం వాటిల్లిందని బాధితుడు తెలిపారు. సమాచారం అందుకున్న నార్సింగ్ పోలీసులు సంఘటన స్థలానికి చేరుకొని జరిగిన సంఘటనపై ఆరా తీశారు. బాధితుడు ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు నార్సింగ్ సీఐ తెలిపారు.
